මගීන් 68 ක් සමග යාපනයේ ඩෙල්ෆ්ට් සිට කුරීකඩ්ඩුවාන් බලා යාත්‍රා කරමින් තිබූ මගී යාත්‍රාවක් අයහපත් කාලගුණික තත්ත්වයකට හසු වී පෙරළී ගිලී යාමට ගිය අවස්ථාවේදී නාවික හමුදාව හා ධීවරයින් එක්ව ඊයේ 1 දා සවස එම යාත්‍රාව හා මගීන් පිරිස බේරා ගැනීමට කටයුතු කර තිබෙනවා.
ඩෙල්ෆ් දූපත හා යාපනය අතර මගීන් ප්‍රවාහනය කරණ මෙම යාත්‍රාව යාපනයේ කුරීකඩ්ඩුවාන් ජැටිය අසලට පැමිණෙමින් තිබියදී කාර්මික දෝෂයක් හේතුවෙන් යාත්‍රාවේ එන්ජිම ක්‍රියා විරහිත වී තිබේ.
මේ දිනවල අයහපත් කාලගුණික තත්ත්වය නිසා උතුරු මුහුද රළු ස්වභාවයකින් පැවතීම හේතුවෙන් එම යාත්‍රාව පෙරළී ගිලෙන්නට යන අවදානම් සහගත තත්ත්වයට පත් වී ඇත.
මේ අවස්ථාවේදී ධීවර බෝට්ටු කීපයක් හා නාවික හමුදාවේ යාත්‍රා කීපයක් ඉතා ඉක්මනින් අනතුරට පත් යාත්‍රාව දෙසට ගොස් එහි මගීන් අනෙක් බෝට්ටු වලට නංවා ගෙන තිබේ.
අනතුරට පත් යාත්‍රාවද කුරීකඩ්ඩුවාන් ජැටිය වෙත ඇදගෙන විත් එය අලුත්වැඩියා කිරීමට භාර දී තිබෙනවා.
