වසර 19කට පෙර කාන්තාවක් සහ ඇයගේ දින 17ක් වයසැති නිවුන් දරුවන් ඝාතනය කිරීමේ ඝාතන නඩුව විසඳීම සඳහා ඉන්දියාවේ කේරළ පොලිසිය විසින් කෘතිම බුද්ධිය (AI තාක්ෂණය) යොදා ගත් පුවතක් වාර්තා වෙනවා.
වාර්තාවලට අනුව, 2006 දී මෙම කාන්තාව සහ ඇයගේ නිවුන් දරුවන් ඝාතනය කරන ලද අතර, පොලිසිය හැකි විගසින් ක්‍රියාත්මක වී ප්‍රධාන සැකකරුවන් දෙදෙනෙකුවන හිටපු හමුදා නිලධාරීන් වූ දිවිල් කුමාර් සහ රාජේෂ් යන අය හඳුනාගෙන ගෙන තිබුණා.
කෙසේ වෙතත්, පසුව මෙම සැකකරුවන් අතුරුදහන් වී ඇති අතර, ඔවුන් සොයා ගැනීමට ගත් සියලු උත්සාහයන් අසාර්ථක වී තිබෙනවා.
ඒ අනුව, වසර 19කට පසු සැකකරුවන් දෙදෙනා පුදුචෙරිහිදීයි අත්අඩංගුවට ගෙන ඇත්තේ.
ඔවුන් දෙදෙනා විෂ්ණු සහ ප්‍රවීන් කුමාර් ලෙස ව්‍යාජ අනන්‍යතාවයක් යටතේ ව්‍යාපාරයක් පවත්වාගෙන යමින් සිට තිබෙනවා.
ඔවුන් දෙදෙනාම පුදුචෙරිහි පිහිටි පාසල් ගුරුවරියන් දෙදෙනෙකු සමගයි විවාහ වී ඇත්තේ.
කේරළ අතිරේක පොලිස් අධිකාරී මනෝජ් ඒබ්‍රහම් මාධ්‍යයට පවසා ඇත්තේ, විමර්ශන කණ්ඩායම දිවිල් කුමාර් සහ රාජේෂ්ගේ පැරණි ඡායාරූප හඳුනා ගැනීමට කෘතිම බුද්ධි තාක්ෂණය භාවිත කළ බවයි.
ඔවුන් වසර 19 කට පසු කෙබඳුවනු ඇත්ද යන්න පිළිබඳ විමසීමේ දී සමාජ මාධ්‍ය හරහා මුහුණු හඳුනාගැනීමේ මෙවලම් ක්‍රියාත්මක කිරීමෙන් පසු, මංගල ඡායාරූප සහිත ෆේස්බුක් ගිණුමක් මොවුන් දෙදෙනාගෙන් එක් අයෙකුට 90%ක් ගැළපී තිබෙනවා.
එම සමාජ මාධ්‍ය ගිණුම මේ වනවිට ප්‍රවීන් කුමාර් ලෙස ජීවත් වන රාජේෂ්ගේ ගිණුම බවටයි හඳුනාගෙන ඇත්තේ.
පසුව ඔහුගේ සම්බන්ධතා පිළිබඳ විමර්ශනයකින් අනතුරුව විෂ්ණු යන නව නාමය යටතේ ජීවත් වූ දිවිල් ද සොයා ගෙන තිබෙනවා.
එම තොරතුරු වලට අනුව පසුව මොවුන් දෙදෙනා අත්අඩංගුවට ගැනීමට පියවර ගෙන තිබෙනවා.
