ඔස්ට්‍රේලියානු තුන් ඉරියව් ක්‍රීඩක මර්කස් ස්ටොයිනිස් එක්දින ක්‍රිකට් පිටියෙන් සමු ගැනීමට තීරණය කර තිබෙනවා.
වහාම ක්‍රියාත්මක වන පරිදි ඔහු මෙලෙස එක්දින පිටියට සමු දීමටයි පියවර ගෙන ඇත්තේ.
2025 ශූරයින්ගේ කුසලාන එක්දින ක්‍රිකට් තරගාවලිය සදහා වන මූලික ඔස්ට්‍රේලියානු සංචිතයට ද ස්ටොයිනිස් නම් කර ඇති නමුත්, ඔහු වෙනුවට ඉදිරියේදී වෙනත් ක්‍රීඩකයෙකු සංචිතයට ආදේශ කිරීමට නියමිතයි.
ශූරයින්ගේ කුසලාන තරගාවලිය සදහා වන අවසන් සංචිත පෙබරවාරි 12 වැනිදා වන විට නිවේදනය කළ යුතු වනවා.
35 හැවිරිදි ස්ටොයිනිස් මේ දිනවල SA20 තරගාවලියට Durban’s Super Giants කණ්ඩායම නියෝජනය කරමින් ක්‍රීඩා කරමින් සිටින අතර, එහිදී ඔහු පාදයක ආබාධයකට ද ලක්ව තිබෙනවා.
2023 එක්දින ලෝක ශූරතාවය දිනූ ඔස්ට්‍රේලියානු සංචිතයේ ද රැදී සිටි ස්ටොයිනිස් එක්දින තරග 71කදී ලකුණු 1495 ක් රැස් කර ඇති අතර, දවා ගෙන ඇති කඩුලු ගණන 48 ක්.
එක්දින පිටියට සමු දුන්න ද, ස්ටොයිනිස් තවදුරටත් පන්දුවාර විස්සයි 20 ජාත්‍යන්තර පිටියේ රැදී සිටිනු ඇති.
