සන්ඩේ ලීඩර් කර්තෘ ලසන්ත වික්‍රමතුංග ඝාතනය සම්බන්ධයෙන් විමර්ශනය කිරීම සඳහා නීතිපතිවරයා අපරාධ පරීක්ෂණ දෙපාර්තමේන්තුවට නව නියෝගයක් ලබා දීමට නියමිත බව සන්ඩේ ටයිම්ස් වාර්තා කරනවා.
ලසන්ත වික්‍රමතුංග ගේ රියදුරු පැහැරගෙන ගොස් සාක්ෂි විනාශ කිරීම සම්බන්ධයෙන් සැකපිට අත්අඩංගුවට ගත් සැකකරුවන් තිදෙනෙකු නිදහස් කිරීමට නීතිපති දෙපාර්තමේන්තුව කළ නිර්දේශය සම්බන්ධයෙන් දැඩි මහජන විවේචන එල්ල වීමෙන් පසුව නීතිපති දෙපාර්තමේන්තුව මෙම තීරණය ගෙන තිබෙනවා.
සිකුරාදා නීතිපති පාරින්ද රණසිංහ සහ ජනාධිපති අනුර කුමාර දිසානායක අතර පැවති සාකච්ඡාවකදී, සැකකරුවන් තිදෙනාට එරෙහිව නීතිමය ක්‍රියාමාර්ග ගැනීමට ප්‍රමාණවත් සාක්ෂි නොමැති බව නීතිපතිවරයා ජනාධිපතිවරයාට සහ රජයේ අනෙකුත් ජ්‍යෙෂ්ඨ පුද්ගලයින්ට දැනුම් දී ඇති බව සන්ඩේ ටයිම්ස් වෙත වාර්තා වී ඇත.
නීතිපතිවරයාගේ ස්ථාවරය පිළිගැනීමට රජය සූදානම් නැතිනම්, ඔහුගේ නිර්දේශයට එරෙහිව රිට් අයදුම්පතක් ගොනු කළ හැකි බව නීතිපති පාරින්ද රණසිංහ අවධාරණයෙන් යුතුව රජයට දන්වා ඇත. කෙසේ වෙතත්, අනාගතයේදී නව කරුණු මතු වුවහොත්, නිදහස් කරන ලද අයට එරෙහිව චෝදනා නැවත ගොනු කළ හැකි බව නීතිපතිවරයා පෙන්වා දී තිබෙනවා.
ලසන්ත වික්‍රමතුංගගේ රියදුරු ඝාතනය ඇසින් දුටු සාක්ෂි කරුවෙක් නොවන බවත්, 2009 අග භාගයේදී තමන් පැහැරගෙන ගිය බවට ඝාතනයෙන් වසර හයකට පසු එනම් 2015 දී ඔහු CID විමර්ශකයින්ට නව ප්‍රකාශයක් ලබා දෙමින් පවසා ඇති බවත් පැහැදිලි කරමින් සිකුරාදා නීතිපති දෙපාර්තමේන්තුව මාධ්‍ය නිවේදනයක් නිකුත් කළා.
මෙම ප්‍රකාශය මත පදනම්ව පරීක්ෂණයක් පවත්වන ලද අතර, ගල්කිස්ස මහේස්ත්‍රාත් අධිකරණයට කරුණු ඉදිරිපත් කර තිබිණි. ප්‍රේම් ආනන්ද උදලගම ලෙස හඳුනාගෙන ඇති පුද්ගලයෙකු නඩුවේ සැකකරුවෙකු ලෙස නම් කර තිබුණද, ප්‍රධාන වශයෙන් හඳුනාගැනීමේ ක්‍රියාවලියේ නීතිමය දුර්වලතා හේතුවෙන් චෝදනා ගොනු කිරීමට සාක්ෂි නොමැතිකම හේතුවෙන් ඔහු නිදහස් කිරීමට තීරණය කළ බව නීතිපති දෙපාර්තමේන්තුව පැවසුවා.
මේ අතර ලසන්ත වික්‍රමතුංගගේ වාහනයෙන් අතුරුදහන් වූ ලේඛනයක් සම්බන්ධයෙන් CID විමර්ශනයේ කොටසක් ලෙස අත්අඩංගුවට ගත් තිස්සසිරි සුගතපාල සහ ප්‍රසන්න නානායක්කාර ද සාක්ෂි නොමැතිකම හේතුවෙන් නිදහස් කළ බව නිවේදනයේ වැඩිදුරටත් සඳහන්වනවා.
