කඩුවෙල බෝමිරිය ප්‍රදේශයේ ජාතික පාසලකට බලහත්කාරයෙන් ඇතුළු වූ පුද්ගලයන් පිරිසක් විද්‍යාලය තුළ කැඩට් පුහුණුවීම්වල නිරතව සිටි පාසල් සිසු සිසුවියන්ට අමානුෂික ලෙස පහරදීම නිසාවෙන් තුවාල ලැබූ සිසු සිසුවියන් දහයකට වැඩි පිරිසක් ඊයේ (11) පස්වරුවේ රෝහල් ගත කර ඇති බව එම විද්‍යාලයේ විදුහල්පතිතුමා පවසනවා.
මෙම පහරදීමට සම්බන්ධ ප්‍රධාන සැකකරු දින කිහිපයකට පෙරත් පාසල් දරුවන් කිහිපදෙනෙකුට පහර දී ඇති අතර ඊයේ දිනයේදිත් තවත් පිරිසක් සමග පැමිණ පාසලට බලහත්කාරයෙන් ඇතුළු වී මෙම පහරදීම සිදුකර ඇති බවයි ඔහු පවසන්නේ.
විද්‍යාලයේ විදුහල්පතිවරයා පැවසූවේ ආදි ශිෂයෙකු සමග විදුහලට ඇතුළු වූ පිටස්තර පිරිසක් මෙලෙස සිසුන් සමග ගැටුම ඇතිකරගත් බවය.
පිරිමි දරුවන්ට පහර දීම සිදුකරන අවස්ථාවේදී ඔවුන් බේරීමට ගිය පාසල් දැරියන්ටද මල් පෝච්චි ඉදල් කොසු මිටවල් ආදියෙන් පහරදීම සිදුකර තිබෙනවා.
මේ සම්බන්ධයෙන් නවගමුව පොලිසියට පැමිණිල්ලක් සිදු කරන ලද බවද විදුහල්පතිවරයා වැඩිදුරටත් පැවසුවා.
