ඇහැළියගොඩ පොලිස් වසමේ පරකඩුව ප්‍රදේශයේ නිවසක ඇතිවූ ආරවුලක් හේතුවෙන් තුවාල ලැබූ පුද්ගලයෙකු ඇහැළියගොඩ රෝහලට ඇතුළත් කිරීමේදී මියගොස් ඇත.
ඇහැළියගොඩ පොලිස් ස්ථානයට ඊයේ (14) අලුයම් කාලයේ ලද තොරතුරක් මත සිද්ධිය සම්බන්ධයෙන් වැඩිදුර විමර්ශන සිදුකර තිබෙනවා.
සිද්ධියෙන් මියගොස් ඇත්තේ වයස අවුරුදු 73ක් වූ පරකඩුව ප්‍රදේශයේ පදිංචිකරුවෙකි.
මියගිය පුද්ගලයා, තම දියණිය හා ඇයගේ සැමියා සමග ඉහත ලිපිනයේ පදිංචිව සිට ඇත.
පොලීසිය සඳහන් කළේ දියණියගේ සැමියාගේ පළමු විවාහයේ දරුවෙකු ද ඔවුන් සමග නිවසේ පදිංචිව සිට ඇති බවය.
ඔහු විසින් පදිංචිව සිටින නිවසේ අයිතිය ඉල්ලා පියා සමග ආරවුලක් ඇති කරගෙන තිබෙන අතර එම අවස්ථාවේදී මරණකරු ආරවුල බේරීමට යාමේදී මුණුබුරා විසින් තල්ලු කිරීම හේතුවෙන් බිම ඇද වැටී තුවාල ලබා රෝහල් ගතකර ඇති බවට අනාවරණය වී ඇත.
මෘතශරීරය ඇහැළියගොඩ රෝහලේ මෘත ශරීරාගාරයේ තැන්පත් කර ඇත.
සිදුවීම සම්බන්ධව සැකකරු අත්අඩංගුවට ගැනීම සඳහා ඇහැළියගොඩ පොලීසිය වැඩිදුර විමර්ශන සිදු කරයි.
