ක්‍රිෂ් ගනුදෙනුවේදී රුපියල් මිලියන 70ක මුදලක් සාපරාදී සාවද්‍ය පරිහරණය කළේ යැයි චෝදනා කරමින් පාර්ලිමේන්තු මන්ත්‍රී නාමල් රාජපක්ෂට අද (18) කොළඹ මහාධිකරණය හමුවේ අධිචෝදනා පත්‍ර භාරදී ඇත.
රගර් ක්‍රීඩාවේ ප්‍රවර්ධනයට බව පවසා ඉන්දීය ක්‍රිෂ් සමාගමෙන් රුපියල් මිලියන 70 ක මුදලක් ලබා ගෙන සාපරාධි සාවද්‍ය පරිහරණ කළේ යැයි චෝදනා ලබා සිටින පාර්ලිමේන්තු මන්ත්‍රී නාමල් රාජපක්ෂට අද (18) අධිකරණය හමුවේ පෙනී සිටින ලෙස දන්වා කොළඹ මහාධිකරණය විසින් නොතීසි නිකුත් කර තිබුණි.
අද(18) මහාධිකරණ විනිසුරු මංජුල තිලකරත්න ඉදිරියේ මෙම නඩුව කැඳවූ අවස්ථාවේදී නාමල් රාජපක්ෂ අධිකරණය හමුවේ පෙනී සිටි අතර, ඇඟිළි සළකුණු ලබා ගැනීමෙන් අනතුරුව, චෝදනා භාර දී රුපියල් ලක්ෂයක මුදල් ඇප සහ රුපියල් ලක්ෂ 10ක ශරීර ඇප දෙකක් මත ඔහු මුදා හැරීමට විනිසුරුවරයා නියෝග කර ඇත.
කෙසේ නමුත් පූර්ව නඩු විභාගය සම්බන්ධ තීරණය සඳහා නඩුව මාර්තු 27 වන දිනට කල් තබා ඇති බවයි තොරතුරු වාර්තා වන්නේ.
