අලුත්කඩේ මහේස්ත්‍රාත් සංකීර්ණය තුළදී සංජීව කුමාර සමරරත්න හෙවත් ගණේමුල්ලේ සංජීව වෙඩි තබා ඝාතනය කිරීම සඳහා නීතිඥවරයෙකු සහ නීතිඥවරියක ලෙස වෙස්වලාගෙන සැකකරුවන් දෙදෙනෙකු පැමිණ ඇතැයි පොලීසිය පවසයි.
අද (පෙබ. 19) පැවති මාධ්‍ය හමුවකදී පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි බුද්ධික මනතුංග මේ බව ප්‍රකාශ කර ඇත.
දැනට සිදු කර ඇති විමර්ශනවලින් අනාවරණය වී ඇත්තේ, වෙඩි තැබීම සිදු කළ පුද්ගලයා නීතිඥයෙකු ලෙස වෙස්වලා ගෙන හිස් අතින් අධිකරණය තුළට පැමිණ ඇති අතර ඔහු කිසිදු පරීක්ෂාවකින් තොරව අධිකරණ භූමියට පැමිණ තිබේ.
ඉන් අනතුරුව නීතිඥවරියක ලෙස වෙස්වලා ගෙන සිටින කාන්තාවකගෙන් ගිනිඅවිය ලබාගෙන ඇති බව පොලිස් මාධ්‍ය ප්‍රකාශකවරයා පැවසීය.
මෙම ගිනි අවිය අපරාධ නඩු විධිවිධාන සංග්‍රහය නමැති ග්‍රන්ථය තුළ සූක්ෂම ආකාරයෙන් රඳවා ගෙන ආ බවට තොරතුරු හෙළි වී ඇතැයි පොලිස් මාධ්‍ය ප්‍රකාශකවරයා පැවසීය.
ඔහු තවදුරටත් සඳහන් කළේ, ගණේමුල්ල සංජීව විත්තු කූඩුවේ සිට ඉන් බැසීමට ආසන්න වෙන අවස්ථාවේදී මෙම සැකකරු විසින් වෙඩි තැබීම සිදු කර ඇති බවයි.
පොලිස් මාධ්‍ය ප්‍රකාශකවරයා වැඩිදුරටත් පැවසුවේ, කොළඹ අපරාධ කොට්ඨාසය සහ අපරාධ පරීක්ෂණ දෙපාර්තමේන්තුව ඇතුළු විශේෂ කණ්ඩායම් 5ක් මේ පිළිබඳව විමර්ශන සිදු කරන බවවයි.
