අම්බලන්ගොඩ කුරුඳුවත්ත ප්‍රදේශයේදී හෙරොයින් ළඟ තබාගැනීම සම්බන්ධයෙන් පාසල් දැරියක් අත්අඩංගුවට ගෙන ඇති බව වාර්තා වේ.
ඇල්පිටිය කොට්ඨාශ අපරාධ ඒකකයේ නිලධාරීන් විසින් ඊයෙ සවස ඇය අත්අඩංගුවට ගෙන ඇත.
අත්අඩංගුවට ගත් දැරිය අම්බලන්ගොඩ රජයේ ප්‍රධාන පාසලක 17 හැවිරිදි ශිෂ්‍යාවක් වන අතර, මෙම වසරේ අ.පො.ස. සාමාන්‍ය පෙළ විභාගයට පෙනීසිටීමට සූදානම් වෙමින් සිටින බවයි තොරතුරු වාර්තා වෙන්නේ.
මත්ද්‍රව්‍ය ජාවාරම සම්බන්ධයෙන් රිමාන්ඩ් භාරයට පත් කර සිටි දැරියගේ සහෝදරයා දින තුනකට පෙර නිවසට පැමිණ ඇති බව මූලික පරීක්ෂණවලින් හෙළි වී ඇති බව පොලිසිය පවසයි.
වාර්තා වන පරිදි එම පුද්ගලයා නොමැති විට ඔහුගේ බිරිඳ මත්ද්‍රව්‍ය ව්‍යාපාරය පවත්වාගෙන ගොස් ඇති අතර ඇය කුඩා දරුවෙක් සිටින මවක් වන බැවින් ගනුදෙනුකරුවන් හමුනොවී මුදල් ලබාගැනීමට මෙම පාසල් දැරිය භාවිත කර ඇත.
