2025 අන්තර්ජාතික මාස්ටර්ස් ලීගය අද(22) දින මුම්බායි හි DY පටිල් ක්‍රීඩා ඇකඩමි ක්‍රීඩාංගණයේදී ඉන්දියාව සහ ශ්‍රී ලංකාව අතර තරගයෙන් ආරම්භ වීමට නියමිතව ඇත.
සචින් තෙන්ඩුල්කාර්, බ්‍රයන් ලාරා, කුමාර් සංගක්කාර, යුවරාජ් සිං, ක්‍රිස් ගේල්, කෙවින් පීටර්සන්, ෂේන් වොට්සන්, ජැක් කලිස්, ජොන්ටි රෝඩ්ස් සහ ඉයන් මෝගන් ක්‍රිකට් පුරාවෘත්තයන් බඳු ප්‍රවීණ ක්‍රීඩකයෝ රැසක් මෙම තරගාවලියට එක්වන බව වාර්තා වේ.
මෙම තරඟාවලිය නවී මුම්බායි, වඩෝදර සහ රායිපූර් යන ඉන්දියාවේ ස්ථාන තුනකදී පැවැත්වීමට කටයුතු සූදානම් කර ඇති අතර ලීග් අදියරේදී මුළු තරඟ 15 ක් පැවැත්වේ. ඉන්පසු අවසන් පූර්ව තරඟ දෙක පිළිවෙලින් මාර්තු 13 සහ 14 යන දිනවල පැවැත්වීමට නියමිතයි.
අවසන් තරඟය මාර්තු 16 වැනි දින රායිපූර්හි ෂහීඩ් වීර් නාරායන් සිං අන්තර්ජාතික ක්‍රිකට් ක්‍රීඩාංගණයේදී පැවැත්වේ.
2025 මාස්ටර්ස් ලීගය සඳහා ක්‍රීඩා කරන ශ්‍රී ලංකා මාස්ටර්ස් සංචිතය :-
අසේල ගුණරත්න, ලහිරු තිරිමාන්න, උපුල් තරංග, අශාන් ප්‍රියන්ජන්, චතුරංග ද සිල්වා, චින්තක ජයසිංහ, දිල්රුවන් පෙරේරා, ඉසුරු උදාන, ජීවන් මෙන්ඩිස්, සීක්කුගේ ප්‍රසන්න, කුමාර් සංගක්කාර (නායක), රොමේෂ් කළුවිතාරණ, ප්‍රදීප් කලුවිතාරණ, නුවන් ප්‍රසාද්
