ගම්පහ දිස්ත්‍රික් පාර්ලිමේන්තු මන්ත්‍රී ප්‍රසාද් සිරිවර්ධන විපක්ෂනායක සජිත් ප්‍රේමදාසගේ මාධ්‍ය ප්‍රකාශක ලෙස පත් කර ඇති අතර ඊට අදාල පත්වීමේ ලිපිය සජිත් ප්‍රේමදාස විසින් ඊයේ (27) පාර්ලිමේන්තුවේ විපක්ෂ නායක කාර්යාලයේ දී ලබා දී ඇත.
සමගි ජන බලවේගයේ මහ ලේකම් පාර්ලිමේන්තු මන්ත්‍රී රංජිත් මද්දුම බණ්ඩාරද එම අවස්ථාවට සහභාගි වී ඇත.
සමගි ජන බලවේගය නියෝජනය කරමින් ගම්පහ මැතිවරණ දිස්ත්‍රික්කයෙන් පළමු වරට මැතිවරණයට ඉදිරිපත් වූ ප්‍රසාද් සිරිවර්ධන පසුගිය මහා මැතිවරණයෙන් මන්ත්‍රීවරයෙකු ලෙස ශ්‍රී ලංකා පාර්ලිමේන්තුවට තේරී පත් විය
.
වේයන්ගොඩ බණ්ඩාරනායක මධ්‍ය මහා විද්‍යාලයෙන් මුලික අධ්‍යාපනයත්, අනතුරුව කැලණිය විශ්වවිද්‍යාලයෙන් උසස් අධ්‍යාපනය හදාරා විද්‍යාවේදී උපාධියක් ලබා සිටින ඔහු වෘත්තියෙන් උසස් පෙළ භෞතික විද්‍යා ගුරුවරයෙකු වේ.
එමෙන්ම ප්‍රසාද් සිරිවර්ධන මේ වන විට සමගි ජන බලවේගයේ මීරිගම ආසනයේ ප්‍රධාන සංවිධායකවරයා ලෙසත් සමගි ජන බලවේගයේ කෘත්‍යාධිකාරී මණ්ඩලයේ සාමාජිකයෙක් ලෙසත් කටයුතු කරමින් සිටියි.
