අත්අඩංගුවට ගැනීමට වරෙන්තු නිකුත් වී ඇති හිටපු පොලිස්පති දේශබන්දු තෙන්නකෝන්ට විදේශගත වීම වළක්වාලමින් මාතර මහෙස්ත්‍රාත් අධිකරණය විදෙස් තමන් තහනමක් පනවා ඇති බව වාර්තා වේ.
ඒ අපරාධ පරීක්ෂණ දෙපාර්තමේන්තුවේ නිලධාරීන් අධිකරණයෙන් කළ ඉල්ලීමක් අනුවයි.
විමර්ශන නිලධාරීන් දේශබන්දු තෙන්නකෝන් සොයා ඔහුගේ හෝකන්දර නිවස සහ ගිරිඋල්ල නිවස පරික්ෂා කළද ඔහු එම නිවාසවල රැඳී සිට නොමැති බව වාර්තා වේ.
2023 වසරේ දෙසැම්බර් මස 31 වැනිදා මාතර වැලිගම ප්‍රදේශයේ W15 හෝටලයට සුදු පැහැති වෑන් රථයකින් පැමිණි පිරිසක් වෙඩිතැබීමක් සිදුකළ අතර ඒ පිළිබඳ ලද තොරතුරකට අනුව එම ස්ථානයට පැමිණි වැලිගම පොලිසියේ මුර සංචාරක රථයක සිටි පොලිස් නිලධාරින් පිරිසක් වෑන් රථය දෙසට ප්‍රතිප්‍රහාරයක් එල්ල කර තිබුණි.
වෑන් රථයේ සිට ප්‍රශ්නගත හෝටලයට වෙඩිතැබීම සිදුකර තිබුණේ කොළඹ අපරාධ කොට්ඨාසයේ නිලධාරීන් පිරිසක් වන අතර වැලිගම පොලීසිය සිදුකළ ප්‍රතිප්‍රහාරය හමුවේ වෑන් රථයේ සිටී කොළඹ අපරාධ කොට්ඨාසයේ නිලධාරීන් දෙදෙනෙක් තුවාල ලැබුවේය.
තුවාල ලැබූ පොලිස් නිලධාරින් දෙදෙනා කරාපිටිය රෝහලට යොමුකළද, එහිදී පොලිස් සැරයන් උපුල් කුමාර නම් අයෙක් ජීවිතක්ෂයට පත් වු අතර අනතුරුව පොලිස් සැරයන්වරයාගේ මරණය සම්බන්ධයෙන් වූ මහෙස්ත්‍රාත් පරීක්ෂණය මාතර මහේස්ත්‍රාත් අධිකරණය හමුවේ සිදුවිය. වසරක පමණ කාලයකට පසු එම මරණ පරීක්ෂණයේ තීන්දුව ඉකුත් 27 වනදා ප්‍රකාශයට පත් විය.
අදාළ තීන්දුවේ දැක්වූණේ ප්‍රශ්නගත අවස්ථාවේ කොළඹ අපරාධ කොට්ඨාසයේ නිලධාරින් එම ස්ථානයට යොමුකිරීම නිත්‍යානුකූල නොවන ලෙස සිදුකර ඇති බවයි.
ඒ අනුව පොලිස් සැරයන්වරයාගේ මරණය අපරාධයක් වන බැවින් ඊට අදාළව එවක වැඩබලන පොලිස්පති දේශබන්දු තෙන්නකෝන් ඇතුළු 8 දෙනෙකු අත්අඩංගුවට ගෙන අධිකරණයට ඉදිරිපත් කරන ලෙස අධිකරණය අපරාධ පරීක්ෂණ දෙපාර්තමේන්තුවට නියෝග කර ඇත.
ඊට අපරාධ පරීක්ෂණ දෙපාර්තමේන්තුවේ කණ්ඩායම් 4ක් යොදවා ඇති අතර ඔවුන් දේශබන්දු තෙන්නකෝන්ගේ හෝකන්දර නිවස සහ ගිරිඋල්ල නිවස පරීක්ෂා කළ නමුත් ඔහු එහි සිට නැති බවටයි තොරතුරු වාර්තා වන්නේ.
කෙසේ වෙතත් අද පාර්ලිමේන්තුවේදී මහජන ආරක්ෂක නියෝජ්‍ය අමාත්‍ය සුනිල් වටගල සඳහන් කළේ, වරෙන්තු නිකුත් කර ඇති දේශබන්දු තෙන්නකෝන් සැඟව ඇති බවයි.
