ඉන්ධන බෙදා හැරීම සම්බන්ධයෙන් මතුව ඇති අර්බුදය පිළිබදව සාකච්ඡා කිරීම සදහා ඉන්ධන පිරවුම්හල් හිමියන් අද (03) පෙරවරුවේ ජනාධිපති අනුර කුමාර දිසානායක හමුවීමට නියමිතව ඇත.
ලංකා ඛනිජ තෙල් නීතිගත සංස්ථාව හා ඉන්ධන බෙදුම්කරුවන් අතර මෙතෙක් පැවැති බෙදුම්කාරිත්ව ගිවිසුම අනුව පිරවුම්හලකින් අලෙවි කෙරෙන සෑම ඉන්ධන ලීටරයකටම ලබා දුන් 3% වට්ටම අහෝසි කිරීමට සංස්ථාව පසුගියදා තීරණය කිරිමත් සමග අලුතින් ඉන්ධන ඇණවුම් නොකිරීමට පසුගිය සිකුරාදා ඛනිජ තෙල් බෙදුම්කරුවන්ගේ සංගමය තීරණය කලේය.
මෙම සිද්ධියත් සමග සති අන්තයේ ඉන්ධන පිරවුම්හල් අසළ දිගු පෝලිම් දක්නට ලැබුණු අතර ඉන්ධන ඇනවුම් නොකිරීමට ගනු ලැබූ තීරණයේ කිසිදු වෙනසක් නොමැති බව ලංකා ඛනිජතෙල් බෙදුම්කරුවන්ගේ සංගමයේ අධ්‍යක්ෂ මණ්ඩල සාමාජික ශාන්ත සිල්වා කියා සිටියි.
ලංකා ඛණිජ තෙල් බෙදුම්කරුවන්ගේ සංගමය සදහන් කළේ, එවන් පසුබිමක ඉන්ධන නිකුත් කිරීමේදී බැංකු සහ ක්‍රෙඩිට් කාඩ්පත් වලින් ගෙවීම් කිරීමට පාරිභෝගිකයන්ට ලබාදී තිබූ අවස්ථාවද අහිමි කිරීමට සිදුවිය හැකි බවයි.
කෙසේ වෙතත්, ඉන්ධන බෙදුම්කරුවන් වෙත ලබාදුන් 3%ක වට්ටම අහෝසි කිරීමට ගත් තීරණයේ කිසිඳු වෙනසක් සිදු නොකරන බව කැබිනට් ප්‍රකාශක, අමාත්‍ය වෛද්‍ය නලින්ද ජයතිස්ස ප්‍රකාශ කර ඇත.
