මාස 48ක විස්තීර්ණ ණය අරමුදල් පහසුකම යටතේ ශ්‍රී ලංකාවට ඩොලර් මිලියන 334ක සිව්වන ණය වාරිකය ලබා දීමට ජාත්‍යන්තර මූල්‍ය අරමුදලේ විධායක මණ්ඩලයේ අනුමැතිය හිමි වීමත් සමඟ, ශ්‍රී ලංකාව සිය බදු එකතු කිරීමේ ඉලක්ක සපුරා ගැනීම අත්‍යාවශ්‍ය බව ජාත්‍යන්තර මූල්‍ය අරමුදල අවධාරණය කර ඇති බව වාර්තා වේ.
ජ්‍යේෂ්ඨ භාණ්ඩාගාර නිලධාරියෙකු පවසන පරිදි ජාත්‍යන්තර මූල්‍ය අරමුදල පෙන්වා දී ඇත්තේ, බදු එකතු කිරීමේ පියවර නිසි ලෙස ක්‍රියාත්මක කළහොත් ශ්‍රී ලංකාවට රුපියල් බිලියන 900 කට වඩා වැඩි බදු ආදායම් ඉලක්කයක් කරා ළඟා විය හැකි බවයි.
මෙහිදී නව බදු පැනවීමක් සිදු නොවන අතර පවතින බදු සංශෝධනය නොකරන බවත්, එමෙන්ම විදේශ සෘජු ආයෝජන වැඩි කිරීමට ජාත්‍යන්තර මූල්‍ය අරමුදල උපදෙස් ලබා දී ඇති බවත් එම නිලධාරියා පවසයි.
මෙම ආදායම් වැඩි කර ගැනීමේ ප්‍රතිපත්ති නිසි ලෙස ක්‍රියාත්මක කළහොත් වසරක් තුළ තවත් සහන පැකේජ දෙකක් ලැබෙනු ඇති බවද භාණ්ඩාගාර නිලධාරියා සඳහන් කර තිබේ.
පසුගියදා මාස 48ක විස්තීර්ණ ණය අරමුදල් පහසුකම යටතේ ශ්‍රී ලංකාවට ඩොලර් මිලියන 334ක සිව්වන ණය වාරිකය ලබා දීමට ජාත්‍යන්තර මූල්‍ය අරමුදලේ විධායක මණ්ඩලයේ අනුමැතිය හිමි වු අතර මේ සමඟ ජාත්‍යන්තර මූල්‍ය අරමුදලෙන් ශ්‍රී ලංකාවට මේ දක්වා ලබා දී ඇති මුළු මූල්‍ය සහාය වි.ගැ.හි. බිලියන 1.02ක් හෙවත් එක්සත් ජනපද ඩොලර් බිලියන 1.34ක් පමණ වේ.
