පෞද්ගලික බස්රථ සඳහා මාර්ග බලපත්‍ර නිකුත් කරන්නේ එම බස්රථවල CCTV ආරක්ෂණ කැමරා පද්ධති සවිකර ඇත්නම් පමණක් බව ජාතික ගමනාගමන කොමිෂන් සභාවේ සභාපති බී.ඩී. විතාරණ පවසයි.
අද (මාර්තු 5) රජයේ ප්‍රවෘත්ති දෙපාර්තමේන්තුවේ පැවති මාධ්‍ය සාකච්ඡාවකට එක් වෙමින් ඔහු මේ බව පැවසීය.
එමෙන්ම කාන්තා හිංසනයන්ට අදාළ පැමිණිලි දැනුම් දීමට ජංගම දුරකතන යෙදවුමක් හඳුන්වා දීමට අපේක්ෂා කරන බව සභාපතිවරයා එහිදී සඳහන් කළේ ය.
ඔහු තවදුරටත් සඳහන් කළේ පොදු ප්‍රවාහනයේදී කාන්තාවන්ට සිදුවන හිංසනයන් වැළැක්වීම සඳහා දීර්ඝ කාලීන වැඩපිළිවෙලක් අවශ්‍ය බවත් පොදු ප්‍රවාහනය කාන්තාවන්ට පොදු අවකාශයක් බවට පත් කිරීමට කටයුතු කළ යුතුව ඇති බවත් ය.
කාන්තා හිංසනය මේ වනවිට පුළුල්ව අර්ථකථනය කර ඇති බවත් එය දණ්ඩ නීති සංග්‍රහයේ 345 වගන්තිය යටතේ අපරාධ වරදක් වන අතර ඒ සඳහා නීති දැඩි කර ඇති බවත් සභාපතිවරයා පවසා ඇත.
කාන්තා හිංසනයේදී වර්තමානයේ කාන්තාව හුදකලා වන තනිව සටන් කිරීමට සිදු වන බවත් සමස්ත මගී ජනතාව සංවිධානය කළ යුතු අතර ඒ සඳහා වැඩපිළිවෙලක් ආරම්භ කර ඇති බවත් ඔහු එහිදි වැඩිදුරටත් අවධාරණය කළේ ය.
