නව වසරේ චීනයේ ජාතික සංවර්ධන අරමුණු සැලසුම් කෙරෙන 14 වැනි චීන මහජන කොංග්‍රසයේ තුන්වැනි සැසිවාරය අද(05) උදෑසන චීනයේ බෙයිජිංහිදී ආරම්භ වී ඇති බව විදෙස් මාධ්‍යය වාර්තා කරයි.
චීනයේ සියලුම ජනවර්ගයන්ට අයත් විවිධ ක්ෂේත්‍රවල ජාතික මහජන කොංග්‍රස් නියෝජිතයන් 3,000කට ආසන්න පිරිසක් ඊට එක්ව ඇති බවයි තොරතුරු වාර්තා වන්නේ.
ජාතික මහජන කොංග්‍රසය චීන රාජ්‍ය පාලනයේ ඉහළම ආයතනය වන අතර වසර පහක ධුර කාලයක් පවතින ජාතික මහජන කොංග්‍රසය සෑම වසරකම සිය පූර්ණ සැසිය පවත්වනු ඇත. එමෙන්ම මෙවර සැසිවාරයේ දී ද චීන අග්‍රාමාත්‍ය ලී චන්ග් 2025 රාජ්‍ය කාර්ය වාර්තාව ඉදිරිපත් කර ඇත.
එම වාර්තාවට අනුව 2024 වසරේ චීනයේ ආර්ථික ධාරිතාව ස්ථාවර ව ව්‍යාප්ත වී තිබෙන බව සඳහන් වන අතර දළ දේශීය නිෂ්පාදිත වටිනාකම යුවාන් ට්‍රිලියන 134.9 දක්වා වැඩි වී ඇත. එය ආර්ථික වර්ධන අනුපාතය 5% බවයි සදහන් වන්නේ. තවද එය ලොව ප්‍රධාන ආර්ථිකයන් අතරින් ප්‍රමුඛ වීම විශේෂත්වයකි.
චීන ආර්ථික වර්ධනය ගෝලීය ආර්ථිකයට වන දායකත්වය සියයට 30ක මට්ටමක අඛණ්ඩව පවත්වා ගෙන යාමට හැකිව ඇති බව ද විදෙස් මාධ්‍ය වාර්තා කරයි.
ඒකාබද්ධ ජාතික වෙළඳපොළක් ගොඩනැගීම, ව්‍යවස්ථාපිත විශ්‍රාම යාමේ වයස ක්‍රමයෙන් ඉහළ නැංවීම ඇතුළු ප්‍රධාන ප්‍රතිසංස්කරණ පියවර මෙවර හඳුන්වා දී ඇති අතර ඊට අමතරව චීනය නිෂ්පාදන කර්මාන්තයේ විදේශ ආයෝජන ප්‍රවේශය සඳහා ඇති සියලුම සීමාවන් ඉවත් කර ඇති බවද සඳහන් වේ. “එක් තීරයක් එක් මාවතක්” වැඩපිළිවෙළ ඒකාබද්ධව ගොඩනැගීමේ දී වෙළෙඳ ආයෝජන සහයෝගීතා වැඩි කිරීමටද චීනය මේ වසරේ අපේක්ෂා කරන බවයි වාර්ත වන්නේ.
2025 වසරේ චීනයේ දළ දේශීය නිෂ්පාදිතය 5% ක වර්ධනයක් අපේක්ෂා කරන බව චීන රාජ්‍ය කාර්ය වාර්තාවේ සදහන් වන අතර එමෙන්ම නාගරික ප්‍රදේශයක සමීක්ෂණයට ලක් විරැකියා අනුපාතය 5.5% ක මට්ටමේ පවත්වා ගැනීම, නව නාගරික රැකියා අවස්ථා මිලියන 12කට වැඩි ප්‍රමාණයක් නිර්මාණය කිරීමට අපේක්ෂිත බව ද වාර්තා වේ.
