එදා විදුලි බල පනතට විරුද්ධ වූ අය ම අද වංචනික ලෙස එම පනත ම ක්‍රියාත්මක කිරීමට සූදානම් වීම දෛවෝපගත සිද්ධියක් යැයි ජන අරගල සන්ධානයේ ජාතික විධායක සභික, පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ පවසයි.
ඔහු මෙම අදහස් පළ කළේ විදුලිබල මණ්ඩලය පෞද්ගලිකකරණය කිරීම සඳහා පසුගිය ආණ්ඩුව ගෙන ආ පනත අහෝසි නොකර සංශෝධනය කිරීමට ආණ්ඩුව සූදානම් වීම පිළිබඳ ඊයේ (05) ජන අරගල සන්ධානය නුගේගොඩ දී පැවැත්වූ විශේෂ මාධ්‍ය හමුවේ දී ය.
එම මාධ්‍ය හමුවේ දී වැඩි දුරටත් අදහස් දැක් වූ පුබුදු ජයගොඩ පවසා සිටියේ,
රනිල් වික්‍රමසිංහගේ ආණ්ඩුව කාලේ විදුලිබල මණ්ඩලය කොටස් කරලා විකුණන්න ‘2024 අංක 36 දරණ ලංකා විදුලි පනත’ නමින් පනතක් පාර්ලිමේන්තුවේ දී සම්මත කළා. ඒ පනත ඉදිරිපත් කළේ එවකට විදුලිබල ඇමති කන්චන විජේසේකර විසින්. කිසිඳු මහජන අදහස් විමසීමකින් තොරව ඉතාමත් වංචනික ලෙස තමයි මේ පනත පාර්ලිමේන්තුවට ඉදිරිපත් කළේ. ඒ මොහොතේ සමාජයෙන් බරපතළ විරෝධයයක් එල්ල වුණා මේ පනත සම්මත කිරීමට එරෙහිව. පනතට එරෙහිව ඒ මොහොතේ විශාල මහජන විරෝධයක් ආවා. වර්තමාන ජාතික ජන බලවේග ආණ්ඩුව පවා මේ පනත ජනතා ද්‍රෝහී පනතක් ඒ නිසා මේ පනත අහෝසි විය යුතුයි කියලා ඉල්ලමින් ඒ වෙලාවේ අධිකරණයට ගියා.
ඉතාම දෛවෝපගත විදිහට ඒ වෙලාවේ මේ පනතට එරෙහිව පැමිණිල්ල ගොණුකලේ වර්තමාන ආණ්ඩුවේ විදුලිබල ඇමතිවරයා. ඒ පැමිණිල්ල ගොණු කරපු විදුලිබල ඇමතිවරයා යටතේ ම දැන් ආණ්ඩුව සූදානම් වෙනවා මේ පනත අහෝසි නොකර ඉතාම වංචනික ලෙස සංශෝධන ලේබලය අලවල නැවත ක්‍රියාත්මක කරන්න. පසුගිය ජනවාරි 28 ආණ්ඩුව විදුලි පනත සංශෝධනය සඳහා මහජන අදහස් විමසීම සඳහා කියලා සංකල්ප පත්‍රිකාවක් නිකුත් කළා.
පළවෙනි කාරණය තමයි මේ පනත සංශෝධනය කරන්න මහජන අදහස් විමසීම කියලා මේ ලබා දුන්න කාලය මුළුමනින්ම වංචාවක් සහ ජනතාව මුලා කිරීමක්. මොකද 28 වෙනිදා ඉඳලා පෙබරවාරි 7 වෙනිදා වෙනකල් තමයි ජනතාවට අදහස් විමසන්න කාලය දීලා තියෙන්නේ. ඒ ඉතාම සීමිත දි ගණනක්.
අනිත් එක මේ සංකල්ප පත්‍රිකාව ඉදිරිපත් කරල තියෙන්නේ ඉංග්‍රීසි භාෂාවෙන් විතරයි. මහජන අදහස් විමසීමකදී අදාළ පත්‍රිකා සිංහල සහ දෙමළ භෂා දෙකෙන්ම ඉදිරිපත් කල යුතුයි කියන රාජ්‍ය භාෂා ප්‍රතිපත්තියට පයින් ගහලා මේ සංකල්ප පත්‍රිකාව ඉංග්‍රීසි භාෂාවෙන් විතරක් ඉදිරිපත් කිරීමෙන්ම පේනවා ආණ්ඩුට හංගන්න දෙයක් මේ පනත ඇතුළෙ තියනවා කියන එක.
අනිත් බරපතළම ප්‍රශ්නය තමයි ජනවාරි 28 සංකල්ප පත්‍රිකාව මහජන අදහස් විමසීම සඳහා යොමු කලාට ජනවාරි 23 වෙනිදා මෙයට අදාළ කැබිනට් අනුමැතිය ඉල්ලලා විදුලිබල ඇමතිවරයා කැබිනට් පත්‍රිකාවක් යොමු කරනවා. ඒකෙ තියෙන්නේ විදුලි පනත සංශෝධනය සඳහා නීතිපතිවරයාට යොමු කරන්න කැබිනට් අනුමැතිය දෙන්න කියලා. එහෙම කලින්ම කැබිනට් අනුමැතිය සඳහා යොමු කරපු දෙයකට මහජන අදහස් විමසීම සම්පූර්ණ වංචාවක්. මොකද ජනතාව කැමති වුනත් නැතත් අපි මේ පනත සම්මත කරනවා කියන එක තමයි ඒ නොකියා කියලා තියෙන්නේ. කංචන විජේසේකරත් ඔය වංචාව ම තමයි කළේ.
දැන් ආණ්ඩුව ඉදිරිපත් කරපු සංකල්ප පත්‍රිකාව හදපු කමිටුවේ ඉන්නෙ කවුද ? ඒකෙ ඉන්නවා විදුලිබල මණ්ඩලයේ හිටපු සභාපතිලා. ඒකෙ ඉන්නවා කලින් විදුලි පනත හදන කමිටුවේ හිටපු අය. ඒගොල්ලො එකතුවෙලා සංකල්ප පත්‍රිකාවක් හදලා ඒක මුලින්ම කැබිනට් මණ්ඩලයෙන් අනුමත කරගෙන මහජන අදහස් විමසනවා. මොන විහිළුවක් ද මේක.
අනිත් එක තමයි ආණ්ඩුව කියනවා මේ පනත ගේන්නෙ සද්භාවයෙන් කියලා. දැන් මේ පනතේ තිබුණු විදුලිබල මණ්ඩල කොටස් කරන යෝජනා එකක්වත් හකුළගෙන නෑ. මේ කොටස් රාජ්‍ය හිමිකාරීත්වය යටතේ තියාගෙන එය අධීක්ෂණය සඳහා රජයේ හෝල්ඩිං කම්පැනියක් යටතට පත් කරන්න තමයි ආණ්ඩුව සූදානම් වෙන්නේ. හැබැයි ආණ්ඩුවට අමතක වෙලා ලංකාවේ නීතිය අනුව සමාගම් පනත යටතේ ආරම්භ කරන ඕනෑම සමාගමක් පෞද්ගලිකකරණය කිරීම සඳහා කොටස් වෙළෙඳපොළට නිකුත් කරන්න පුළුවන් කියන කාරණය.
දැන් ජාතික ජන බලවේග ආණ්ඩුව හිතාගෙන ඉන්නෙ හැමදාම ඒගොල්ලො බලයෙ ඉඳී කියලද දන්නෑ. මේ කරන වැඩෙන් වෙනත් ආණ්ඩුවකට පුළුවන් වෙනවා පහසුවෙන් විදුලිබල මණ්ඩලයේ කොටස් විකුණන්න. ඒකට ඕන පසුබිම තමයි දැන් ජාතික ජන බලවේග ආණ්ඩුව හදල දෙන්න සූදානම් වෙන්නේ.
අනිත් කාරණය තමයි මේ පනත ඉදිරිපත් කරද්දි ලංකාවෙ විදුලිබල පද්ධතිය ඉන්දියාව එක්ක සම්බන්ධ කරන්න අදාළව ගෙනාව වගන්ති කිසිවක් සංශෝධනය වෙන්නෙ නෑ. මේ වගන්ති නිසා රටේ ස්වාධීනත්වය බරපතළ තර්ජනයකට ලක් වෙනවා කියල බරපතළ සමාජ විරෝධයක් ආවා. හැබැයි ආණ්ඩුව ඒ විරෝධය මායිම් නොකර තමයි පනත සංශෝධනය කරන්න සූදානම් වෙන්නේ.
අපි දැක්කා විදුලිබල මණ්ඩලයේ කොටස් විකුණන්න ආණ්ඩුවේ මන්ත්‍රීවරියක් ජනවාරි 3 පාර්ලිමේන්තුවේ දි කියනවා මේ පනත සංශෝධනය කරන්න අපි වගකිව යුතු පාර්ශවවලින් ඇහුවා කියලා. ඇය කියන විදිහට ආණ්ඩුව මේ පනත ගැන අදහස් විමසල තියෙන්නේ ලෝක බැංකු නියෝජිතයන්ගෙන්, ආසියානු සංවර්ධන බැංකුවෙන් සහ වාණිජ මණ්ඩලයෙන්. ඔන්න ආණ්ඩුව අදහස් විමසපු වගකිවයුතු පාර්ශ්ව.
මේ ඔක්කොම ප්‍රාග්ධන අවශ්‍යතා වෙනුවෙන් ජනතාව පීඩාවට පත් කරන ඒකාධිකාරයන්. ඒගොල්ලන්ගෙන් තමයි දැන් ආණ්ඩුව අදහස් විමසන්නේ. අනිත් එක ඇය කියනවා අපි මේ පනතෙන් විදුලිබල මණ්ඩලය පෞද්ගලිකකරණය කරන්නෑ හැබැයි පෞද්ගලික ආයෝජන ගේන්න විශේෂ ක්‍රමවේදයක් සකස් කරනවලු. මේක නිකම් විහිළුවක්.
අපි ආණ්ඩුවට කියනවා විදුලිබල මණ්ඩලය විකුණන්න ජනතාද්‍රෝහී විදිහට ගෙනාව මේ පනත වහාම අහෝසි කරන්න. මොකද මේ පනත තවම නීතියක් බවට පත් වෙලා නෑ. හැබැයි පනත අහෝසි නොකළොත් මේක ඉබේ ම නීතියක් බවට පත් වෙනවා. එහෙම තක්කඩි විදිහට තමයි මේ පනත හදල තියෙන්නේ. අනිත් එක ආණ්ඩුව කිව්වේ බලයට එන්න කලින් මේ පනත අහෝසි කරනවා කියලා. දැන් සංශෝධන කතන්දර කියන්න ආණ්ඩුවට අයිතියක් නෑ.
අනිත් එක තමයි ප්‍රාග්ධන බූවල්ලන්ගේ අවශ්‍යතා වෙනුවෙන් ජනතා ද්‍රෝහී පනතක් ක්‍රියාත්මක කරන්න ආණ්ඩුවට සදාචාර අයිතියකුත් නෑ. ඒ නිසා වහාම මේ වංචනික ක්‍රියාව නවත්තන්න ඕන. එහෙම නොවුනොත් ජනතා විරෝධයක් ගොඩ නගල මේ පනත අහෝසි කරවන්න අවශ්‍ය මැදිහත් වීම අපි කරනවා කියලත් ජන අරගල සන්ධානය විදිහට මේ වෙලාවෙ මතක් කරනවා.
