ඇල්පිටිය, දෙමටගහකන්ද, නවදගල ප්‍රදේශයේ පදිංචි වයස අවුරුදු 42ක පුද්ගලයෙකු අතුරුදහන් බවට පසුගිය මස 14 වැනිදා එම පුද්ගලයාගේ බිරිඳ විසින් ඇල්පිටිය පොලිස් ස්ථානයට සිදු කරන ලද පැමිණිල්ලකට අනුව විමර්ශන ආරම්භ කර ඇති අතර අතුරුදහන් වූ පුද්ගලයාගේ මෘත ශරීරය දෙමටගහකන්ද ප්‍රදේශයේ ඉඩමක පිහිටි පාලු ළිඳකට දමා පස් දමා වසා තිබියදී ඊයේ (06) පොලිසිය විසින් සොයාගෙන ඇති බව වාර්තා වේ.
දැනට සිදු කළ විමර්ශනයේදී අනාවරණය වී ඇත්තේ, අදාළ ඉඩමේ හිමිකරුගෙන් සිදු කළ ප්‍රශ්න කිරීමේදී ඔහු විසින් වන සතුන් දඩයම් කිරීමට අදින ලද විදුලි රැහැනක ගැටී මෙම පුද්ගලයා මියයාම හේතුවෙන් ඔහු විසින් තවත් පුද්ගලයෙකු සමඟ එක්වී මෘත ශරීරය එම පාළු ළිඳට දමා වසා ඇති බවටයි.
ඒ අනුව, ඉඩමේ හිමිකරු හා ඔහුට සහාය දුන් පුද්ගලයා අත්අඩංගුවට ගෙන ඇති අතර අත්අඩංගුවට ගත් සැකකරුවන් අවුරුදු 38 හා 46 වයස්වල පසු වන දෙමටගහකන්ද ප්‍රදේශයේ පදිංචිකරුවන් වේ.
ඇල්පිටිය පොලිසිය මේ පිලිබඳ වැඩිදුර විමර්ශන සිදු කරනු ලබයි.
