ඇඹිලිපිටිය අධ්‍යාපන කලාපයට අයත් පාසලක ගුරුවරයෙක් විසින් ඊයේ (7) ගුරුවරියකට පහරදීමක් සිදුකර ඇති බව වාර්තා වේ.
මෙම පහරදීම සම්බන්ධයෙන් මොණරාගල දිස්ත්‍රික් පාර්ලිමේන්තු මන්ත්‍රී චතුරි ගංගානි අද (8) පාර්ලිමේන්තුවේදී විශේෂ ප්‍රකාශයක් සිදුකරමින් ඊට වහාම පියවර ගන්නා ලෙස ඉල්ලා සිටියේය.
අදාළ පහරදීම විදුහලේ විදුල්පතිතුමිය ඉදිරියේ සිදුකර ඇති බවත්, පහරකෑ ගුරුවරිය මේ වනවිට රෝහල්ගතව ප්‍රතිකාර ලබන බවත් ඇය මෙහිදී පැවසීය.
මෙම අවස්ථාවේදී නැගීසිටි අග්‍රාමාත්‍ය ආචාර්ය හරිනි අමරසූරිය පවසා සිටියේ, මෙම සිද්ධිය අද උදෑසන වාර්තා වූ බවත්, මෙම පහරදීම සම්බන්ධයෙන් අනිවාර්යයෙන් නීතිමය ක්‍රියාමාර්ග ගන්නා බවත් ය.
එමෙන්ම විනය ක්‍රියාමාර්ග ගන්නා ලෙස අධ්‍යාපන අමාත්‍යාංශයට දැනුම්දෙන බවත්, අද (8) දවස ඇතුළත එහි ප්‍රගතිය පාර්ලිමේන්තුවට ඉදිරිපත් කරන බවත් අගමැතිනිය වැඩිදුරටත් සඳහන් කර ඇත.
