රුපියල් එක්කෝටි හැත්තෑ අට ලක්ෂයක් වටිනා මත්ද්‍රව්‍ය තොගයක් පසුගිය සති දෙකක කාලය තුළ කොළඹ මධ්‍යම හුවමාරුව තුළ භාර ගැනීමට නොපැමිණි පාර්සල් තුළ තිබී ශ්‍රී ලංකා රේගුවේ තැපැල් තක්සේරු අංශයේ නිලධාරීන් විසින් සොයා ගෙන තිබෙනවා.
මෙම පාර්සල් ප්‍රංශය, අමෙරිකාව, කැනඩාව, සහ නෙදර්ලන්තය යන රටවල සිට මහනුවර, මීගමුව, ජා ඇළ, වැල්ලවත්ත, නුගේගොඩ, තංගල්ල, මහියංගනය සහ යාපනය යන ප්‍රදේශවල පිහිටි ලිපිනයන් වෙත භාර දීම සඳහා කොළඹ මධ්‍යම තැපැල් හුවමාරුව වෙත ලැබී තිබුණා.
මෙවැනි පාර්සල් 20 ක් පසුගිය සති දෙකක කාළය තුළ තුළ මධ්‍යම තැපැල් හුවමාරුව වෙත ලැබී තිබූ අතර එම පාර්සල් භාර ගැනීමට කිසිවෙකු නොපැමිණීම නිසා පසුගිය 19 වැනි දින එම පාර්සල් පරීක්ෂා කිරීමට තැපැල්පතිවරයාගේ අනුමැතිය ලැබී තිබුණා.
ඒ අනුව එම පාර්සල් විවෘත කර පරීක්ෂා කළ අතර එහිදී පාර්සල් 14ක ‘කුෂ්’ නැමැති මත්ද්‍රව්‍ය ග්‍රෑම් 272ක් සහ ‘මෙතැම්පටමයින්’ නම් මත්පෙති 2,049ක් සෙයා ගැනීමට හැකිව තිබුණා.
පසුව මෙම මත්ද්‍රව්‍ය තොගය රේගු මත්ද්‍රව්‍ය පාලන අංශයේ නිලධාරීන් විසින් හදුනා ගෙන සහතික කිරීමෙන් පසුව මේ පිළිබද වැඩිදුර විමර්ශන කටයුතු සදහා පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට පියවර ගෙන තිබෙනවා.
