අනුරාධපුර රෝහලේදී වෛද්‍යවරියක් ලිංගික හිංසන සිදුකිරීමේ සිද්ධියට අදාළ නඩුව අද (28) අනුරාධපුර මහේස්ත්‍රාත් අධිකරණයේදී කැඳවා ඇත.
අද දිනයේදී සිද්ධියට අදාළව රක්ෂිත බන්ධනාගාර කර ඇති සැකකරු හඳුනාගැනීමේ පෙරට්ටුවකටද ඉදිරිපත් කර තිබූ අතර වෛද්‍යවරිය සැකකරු හඳුනා ගෙන ඇති බව වාර්තා වේ.
අනුරාධපුර ශික්ෂණ රෝහලේ වෛද්‍යවරියක බරපතළ ලෙස අපයෝජනය කිරීමේ සිද්ධියේ සැකකාර හිටපු යුද හමුදා සෙබළා හඳුනා ගැනීමේ පෙරෙට්ටුව පසුගිය මාර්තු 24 පැවැත්වීමට නියමිතව තිබුණ ද එම හඳුනාගැනීම අද දිනය දක්වා කල් තැබීමට අනුරාධපුර ප්‍රධාන මහෙස්ත්‍රාත් නාලක සංජීව ජයසූරිය නියෝග කලේය.
සැකකරු හඳුනාගැනීමේ පෙරට්ටුව සඳහා පැමිණිලිකාර වෛද්‍යවරිය අධිකරණය හමුවේ පෙනී නොසිටීම හේතුවෙන් පෙරෙට්ටුව මෙලෙස දෙවන වරටත් යළි කල් දැමීමට සිදුව තිබුණි.
මෙම සිද්ධියේ පැමිණිලිකාර වෛද්‍යවරිය පෞද්ගලික හේතුවක් මත අධිකරණය හමුවේ පෙනී නොසිටින බව එහිදී අනුරාධපුර පොලීසිය අධිකරණයට දැනුම් දී ඇත.
කෙසේවෙතත්, පැමිණිලිකාර වින්දිත වෛද්‍යවරියගේ අයිතිවාසිකම් වෙනුවෙන්, අධිකරණය හමුවේ පෙනී සිට කරුණු දක්වමින් ජනාධිපති නීතිඥ කාලිංග ඉන්ද්‍රතිස්ස සඳහන් කර තිබුනේ මෙම සිද්ධිය පිළිබඳව ප්‍රධාන මාධ්‍ය සහ විශේෂයෙන් සමාජ මාධ්‍ය ඔස්සේ විවිධ තොරතුරු සංසරණය වෙමින් පවතින බවයි.
ඒ අනුව, අද දිනයේ දීර්ඝව කරුණු දැක්වීමට අපේක්ෂා කරන බව ද ජනාධිපති නීතිඥවරයා අධිකරණයට පවසා ඇත.
