පසුගිය මාර්තු 22 වනදා කොළඹ දී ස්ටිකර් ඇලවීමක් සම්බන්ධයෙන් අත්අඩංගුවට ගත් 22 හැවිරිදි මොහොමඩ් රුස්දි තරුණයාට එරෙහිව ජනාධිපති අනුර කුමාර දිසානායක විසින් දින 90ක රැඳවුම් නියෝගයක් නිකුත් කිරීම සම්බන්ධයෙන් පුරවැසි ව්‍යවස්ථා සභාව සංවිධානය විසින් සිය කණගාටුව ප්‍රකාශ කර ඇත.
නිවේදනයක් නිකුත් කරමින් ඔවුන් සඳහන් කරන්නේ, වසර ගණනාවක් තිස්සේ ශ්‍රේෂ්ඨාධිකරණයේ මෙන්ම ජාත්‍යන්තර මට්ටමින්ද අභියෝගයට ලක්වූ, අධිකරණ නියෝගයකින් තොරව පුද්ගලයන් වසර ගණනාවක් රඳවා තබාගැනීමේ අවදානමක් ඇති, අමානුෂික පනතක් භාවිත කිරීම අශිෂ්ඨ බවයි.
එමෙන්ම ජාතික ජනබලවේගය තම මැතිවරණ ප්‍රතිපත්ති තුළ, PTA පනත අහෝසි කළ යුතු බව ප්‍රකාශ කර තිබුණු බවත්, මේ වනවිට ජනාධිපතිවරණයෙන් මාස හයක කාලයක් ගතවී ඇතත්, එම පොරොන්දුවේ කිසිදු ක්‍රියාවක් හෝ වැඩපිළිවෙලක් ආරම්භ වී නොමැති වීම කණගාටුදායක දෙයක් බවත් එම නිවේදනයේ සඳහන් කර ඇත.
ත්‍රස්ථවාදයට එරෙහිව ක්‍රියාත්මක විය යුතු නව නීතිමය යෝජනා සහ නීති රීති සම්පාදනය කිරීම රටේ ආරක්ෂාව සඳහා අත්‍යවශ්‍ය වුවත්, එය අයුක්ති සහගත නීතියක් නොවිය යුතු බව අවධාරණය කරන ඔවුන්, වහාම මොහොමඩ් රුස්දිට එරෙහිව නිකුත් කළ රඳවා ගැනීම් නියෝගය අවලංගු කරන ලෙසත් නව ව්‍යවස්ථාවක් තුළින් ත්‍රස්තවාදය වැලක්වීම සඳහා නීතී ගෙන එන ලෙසත් එමගින් ඉල්ලා සිටියි.
එම නිවේදනය පහතින්,
CCC-Press-07.04
