ඊශ්‍රායලයට අපහාස වන ආකාරයේ ස්ටිකරයක් ඇලවීමේ සිද්ධියක් සම්බන්ධයෙන් චෝදනාවකට ත්‍රස්තවාදය වැළැක්විමේ පනත (PTA) යොදා ගනිමින් අත්අඩංගුවට ගෙන රඳවා ගෙන සිටි තරුණයා නිදහස් කර ඇති බව වාර්තා වේ.
ඒ, ඔහු අත්තනගල්ල මහේස්ත්‍රාත් අධිකරණයට ඉදිරිපත් කිරීමෙන් අනතුරුවයි.
නිට්ටඹුවේ පදිංචි 22 හැවිරිදි පසුවන මොහොමඩ් රුෂ්ඩි නමැති තරුණයෙක් පසුගිය මාර්තු 22 වන දා මෙලෙස අත්අඩංගුවට ගෙන තිබුණු අතර, අත්අඩංගුවට ගැනීම සම්බන්ධයෙන් ඉකුත් දා පොලීසිය නිවේදනයක් නිකුත් කරමින් සඳහන් කළේ මෙම ස්ටිකර් ඇලවීම සම්බන්ධව ලද තොරතුරක් මත ශ්‍රී ලංකා පොලිසිය විසින් විමර්ශනයක් ආරම්භ කල බවයි.
එම විමර්ශනයේදී මෙම ක්‍රියාව සිදු කරන ලද තරුණයා සම්බන්ධව හෙළිදරව් වූ තොරතුරු අනුව ඔහු හුදෙක්ම ස්ටිකරයක් ඇලවීමේ ක්‍රියාවෙන් ඔබ්බට වු යම් දැඩි මතධාරියෙකු බවට අනාවරණය වීම සහ විමර්ශනයේදී අනාවරණය වූ සෙසු වැදගත් තොරතුරු වලට ද අනුව, යම් ආකාරයකින් ත්‍රස්තවාදී ක්‍රියාවක් කිරීමට ප්‍රවේදීතාවයක් දක්වන පුද්ගලයෙකු බවට තිබූ සාධාරණ සැකය මත මෙම අත්අඩංගුවට ගැනීම සිදු කළ බවද පොලීසිය පැවසීය.
