අධිවේගී මාර්ගවල ගමන් ගන්නා රථ වාහනවලට අදාළ ගෙවීම් බැංකු කාඩ්පත් මගින් සිදු කිරීමේ ව්‍යාපෘතියක් ආරම්භ කිරීමට ප්‍රවාහන මහාමාර්ග හා සිවිල් ගුවන් සේවා අමාත්‍යංශය පියවර ගෙන ඇත.
ලබන මැයි මාසයේ සිට බැංකු කාඩ්පත් මගින් ගෙවීම් කිරීමේ සේවාව ක්‍රියාත්මක කෙරෙන අතර, ඒ අනුව බැංකු debit හා Credit කාඩ්පත් මගින් මෙන් ම QR කේතය භාවිතයෙන් අදාළ ගෙවීම් සිදුකළ හැකි ය.
මෙයට අදාළව නියමු ව්‍යාපෘතියක් හෙට (අප්‍රේල් 11) කොට්ටාව හා කඩවත හුවමාරු මධ්‍යස්ථානවලින් ආරම්භ කරන බව මාර්ග සංවර්ධන අධිකාරියේ අධ්‍යක්ෂ ජනරාල් එස්.එම්.පී. සූරියබණ්ඩාර පවසයි.
ඔහු පවසන්නේ බැංකු කාඩ් පත් මගින් මෙන්ම දැනට ක්‍රියාත්මක වන සාමාන්‍ය ක්‍රමවේදයට අනුව මුදලවලින් ගෙවීම් කටයුතු සිදුකළ හැකි බවත් මෙමගින් වඩාත් කාර්යක්ෂම සේවාවක් ඉදිරියට ලබා දීමට හැකි වනු ඇති බවත් ය.
මේ සඳහා මාර්ග සංවර්ධන අධිකාරිය හැටන් නැෂනල් බැංකුව අතර ගිවිසුම්ගතවීම පසුගිය දා ප්‍රවාහන මහා මාර්ග හා සිවිල් ගුවන් සේවා අමාත්‍ය බිමල් රත්නායකගේ ප්‍රධානත්වයෙන් සිදුකෙරුණි.
