ජාතික ජන බලවේග ආණ්ඩුව විසින් ගෙන යනු ලබන බොරු දේශපාලනය නිසා බහුතරයකට ආණ්ඩුව එපාවී ඇති බව විපක්ෂ නායක සජිත් ප්‍රේමදාස පවසයි.
ඔහු මේ බව සඳහන් කළේ, සමගි ජන බලවේගයේ පළාත් පාලන මැතිවරණ ජය තහවුරු කිරීම සඳහා මින්නේරිය ප්‍රදේශයේ පැවති ජන රැලියක් අමතමිනි.
අලුත් අවුරුද්ද සමරන මොහොතේ රටේ ලක්ෂ සංඛ්‍යාත ජනතාව දුෂ්කරතා, අගහිඟතා රැසකින් පෙළෙන බවත්, බලාපොරොත්තු රැසක් හමුවේ ආණ්ඩුව පත් කර ගත්තත් බලය ලැබීමට පෙර ප්‍රකාශ කළ දේවල් නොකරන ජනතාව රවටන බොරුකාර ‘පච ආණ්ඩුවක්’ බවට වාර්තා තබා ඇති බව ඔහු චෝදනා කරයි.
භාණ්ඩ මිල අඩු කරන බවට දුන් පොරොන්දුව කඩ කිරීම හේතුවෙන් හාල්, කිරිපිටි වැනි අත්‍යවශ්‍ය ආහාර පාන වල මිල ඉහළ ගොස් ඇති බවත් ඔහු පවසයි.
ඔහු වැඩිදුරටත් පවසන්නේ, මැතිවරණ වේදිකාවේ මන්තරයක් මෙන් බොරුව ජප කරන බවයි.
