උපකාරක පන්ති ගුරුවරියක් පොලිස් යතුරුපැදි සහ පොලිස් මෝටර් රථ සමග ගමන් කිරීම දැක්වෙන වීඩියෝව පිළිබඳව විමර්ශන ආරම්භ කර ඇති බව පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී බුද්ධික මනතුංග පවසයි.
ඔහු සඳහන් කළේ, 5 ශ්‍රේණිය ශිෂ්‍යත්ව විභාගය සඳහා උපකාරක පන්ති පවත්වන ගුරුවරියක් මෙම සිද්ධියට සම්බන්ධ බව අනාවරණය වී ඇති බවයි.
අදාළ ගුරුවරිය විසින් තමන්ගේ පුද්ගලික ප්‍රතිරූපය ගොඩනගා ගැනීම සඳහා මෙම පොලිස් සම්පත් භාවිත කර තිබෙන බවට මේ වන විට හෙළි වී ඇති බවත් පොලීසිය පවසයි.
5 වසර ශිෂ්‍යත්ව විභාගයට මුහුණ දෙන දරුවන්ට ශිෂ්‍යත්ව පෙරහුරු පන්ති පවත්වන හයේෂිකා ප්‍රනාන්දු නමැති ගුරුවරිය සහභාගී වන උත්සවයක් සඳහා පොලිස් පරිවාරක රථ ලබාදී තිබෙන අයුරු එම උත්සවයේ සජීවී විකාශය අතරතුර දක්නට ලැබුණි.
අදාළ ගුරුවරියගේ මූලිකත්වයෙන් සංවිධානය කර තිබූ ‘ශ්‍රී ලංකාවේ දැවැන්තම ශිෂ්‍යත්ව හපනුන් ඇගයීමේ සම්මාන උ‍ළෙල’ නමින් උත්සවයක් පෙරේදා (17) කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ පවත්වා තිබුණි.
එම උත්සවයේ සජීවි විකාශයක් අතරතුර ලබා ගත් වීඩියෝ දර්ශනවල දැක්වෙන්නේ සම්මන්ත්‍රණ ශාලාව වෙත ඇය පැමිණී මෝටර් රථය වෙනුවෙන් ශ්‍රීලංකා පොලිසියේ මෝටර් බයිසිකල් 4ක් සහ තවත් පරිවාරක මෝටර් රථයක් මඟින් විශේෂ පොලිස් ආරක්ෂාවක් ලබාදී ඇති බවයි.
