හෙල්මට් පැළඳ සැක කටයුතු ලෙස හැසිරෙන පුද්ගලයින් පරීක්ෂා කරන ලෙස පොලිස් මූලස්ථානය නිවේදනයක් නිකුත් කරමින් පොලිස් නිලධාරීන්ට උපදෙස් ලබා දී ඇති බව සඳහන් වේ.
එම නිවේදනයේ සඳහන් කර ඇත්තේ, පසුගිය කාලය තුළ දිවයිනේ විවිධ ප්‍රදේශවල සිදුවූ වෙඩි තැබීම් හා මනුෂ්‍ය ඝාතන ඇතුළු විවිධ අපරාධ සඳහා සැකකරුවන් පැමිණියමේදී හිස හා මුහුණ ආවරණය වන පරිදි හිස් වැසුම් පැළඳ අපරාධ සිදු කර ඇති බව නිරීක්ෂණය වී ඇති බවයි.
හිස් වැසුම් පැළඳ සිටීම අවශ්‍යවනුයේ යතුරුපැදියක ගමන් කරන අවස්ථාවන්හිදී වන අතර එය පැදිකරුගේ හා පසුපැදිකරුගේ ආරක්ෂාව සඳහා පමණක් වේ.
එබැවින් යම් පුද්ගලයෙකු යතුරුපැදියක ගමන් නොකරන අවස්ථාවකදී ආරක්ෂිත හිස් වැසුම් පැළඳ සැකකටයුතු ලෙස හැසිරෙන බව නිරික්ෂණය වූ විට එම පුද්ගලයා සහ ඔහු සන්තකයේ ඇති බඩු බාහිරාදිය පරික්ෂා කිරීම සිදුකළ යුතු බව පොලිස් මූලස්ථානය පොලිස් නිලධාරීන්ට උපදෙස් දී ඇත.
