එක කුස උපන් තම සහෝදරිය ගෙල බැඳි රන් මාලය සහ පෙන්ඩනය කොල්ලකා පසුව ගෙල මිරිකා ඝාතනය කිරීමේ සිද්ධියක් සම්බන්ධයෙන් මහාධිකරණය හමුවේ අධි චෝදනා ලබා සිටි විත්තිකාර සහෝදරයෙකු එකී චෝදනාවට වරදකරු බවට තීන්දු කළ පොළොන්නරුව පළාත්බද මහාධිකරණ විනිසුරු රුචිර වැලිවත්ත ඔහුට මරණීය දණ්ඩනය නියම කර ඇති බව වාර්තා වේ.
ඊට අමතරව රන් මාලය සහ පෙන්ඩනය කොල්ල කෑමේ චෝදනාවට විත්තිකරුට වසර දහයක බරපතළ වැඩ සහිත සිර දඬුවමක් නියම කළ මහාධිකරණ විනිසුරුවරයා ඊට අමතරව රුපියල් විසිදහසක දඩයක් ගෙවන ලෙසට ද නියෝග කරනු ලැබීය.
දඩ මුදල් ගෙවීම පැහැර හරින්නේ නම් විත්තිකරුට තවත් වසරක ලිහිල් සිර දඬුවමක්ද නියම කර ඇති බව වාර්තා වේ.
මෙසේ මරණ දඬුවම සහ සිර දඬුවම් නියම වූයේ පොළොන්නරුව තල්පොත පදිංචිකරුවකු වන කේ. ජී. ටිකිරිබංඩා නමැත්තෙකුට ය.
2013 වසරේ අගෝස්තු මස 13 දින හෝ ඊට ආසන්න දිනයක පොළොන්නරුව මහාධිකරණ බල ප්‍රදේශයට අයත් තල්පොතදී එක කුස උපන් සිය බාල සහෝදරිය වන කේ. ජී. ලොකු මැණිකේ යන අය ගෙල බැඳ සිටි රන් මාලය සහ පෙන්ඩනය කොල්ලකා පසුව ගෙල සිර කර තම සහෝදරිය මරා දැමූ බවට නීතිපතිවරයා විසින් ලංකා දණ්ඩ නීති සංග්‍රහයේ 296 වන වගන්තිය යටතේ සහ රන් මාලය සහ පෙන්ඩනය කොල්ලකෑ බවට ලංකා දණ්ඩ නීති සංග්‍රහයේ 380 වගන්තිය ප්‍රකාරව මෙම විත්තිකරුට එරෙහිව පොළොන්නරුව මහාධිකරණය හමුවේ අධි චෝදනා ගොනු කර තිබුණි.
මෙම නඩුව විභාගයට ගැනුණු අවස්ථාවන්වලදී නඩුවට අදාළ කිසිදු ඇසින් දුටු සාක්ෂියක් අධිකරණයට ඉදිරිපත් නොවූ අතර පරිවේෂණීය සාක්ෂි පමණක් උපයෝගි කර ගෙන නඩුව විභාග කර විත්තිකරු වරදකරු කරමින් නඩුවේ තීන්දුව ප්‍රකාශයට පත් කිරීමට මහාධිකරණ විනිසුරු රුචිර වැලිවත්ත සමත්වීම විශේෂත්වයකි.
මෙම නඩුවේ ලඝු නොවන මූලික විභාගය පොළොන්නරුව මහෙස්ත්‍රාත් අධිකරණය හමුවේ පැවති අතර නීතිපතිවරයා විසින් විත්තිකරුට එරෙහිව අධි චෝදනා ගොනු කිරීමෙන් අනතුරුව වැඩිදුර විභාගය සඳහා පොළොන්නරුව මහාධිකරණයට යොමු කර තිබිණි.
පැමිණිල්ල වෙනුවෙන් නීතිපතිවරයා නියෝජනය කරමින් රජයේ අධිනීතිඥ නිමංක ජයවික්‍රම පෙනී සිටි අතර විත්තිකරු වෙනුවෙන් නීතිඥ චන්දික තිලකරත්න පෙනී සිටියේ ය.
සිය නැඟණිය ගෙල බැඳි රන් මාලය සහ පෙන්ඩනය කොල්ලකා ගෙල සිර කර ඇය මරා නිවසේ ඇඳ යට සඟවා ඇති විත්තිකාර අයියා පසුව නැඟණියගේ අවමගුලටත් පැමිණ සිට ඇති බව අධිකරණ නඩු විභාගයේදී අනාවරණ විය.
