අධිකරණයට අපහාස කිරීම පිළිබඳ පනත සම්බන්ධයෙන් පවතින ගැටලු ශ්‍රී ලංකා නීතීඥ සංගමය සහ අධිකරණ සේවා කොමිෂන් සභාව සමඟ සාකච්ඡා කරන බව අධිකරණ අමාත්‍ය හර්ෂණ නානයක්කාර පවසයි..
අද (08) පාර්ලිමේන්තුවේදී අධිකරණ අමාත්‍යවරයා මේ බව පවසා සිටියේ, අධිකරණය තුළ දුරකථනය නාද වීම හේතුවෙන් රක්ෂිත බන්ධනාගාරගත කිරීමට නියම වී අඟුණකොළපැලැස්ස බන්ධනාගාරයේ රඳවා සිටියදී මිය ගිය පුද්ගලයෙකුගේ මරණය සම්බන්ධයෙන් පාර්ලිමේන්තු මන්ත්‍රීවරුන් විසින් විමසූ අවස්ථාවේදීය.
මෙහිදී, පාර්ලිමේන්තු මන්ත්‍රී ජනාධිපති නීතීඥ ෆයිසර් මුස්තාපා පවසා සිටියේ අධිකරණයකදී දුරකථනය නාද වීම, නීතිඥවරුන්ට මෙන්ම ඕනෑම අයෙකුට සිදුවිය හැකි යමක් බවත්, එවැනි හේතුවක් මත පමණක් පුද්ගලයෙකු රක්ෂිත බන්ධනාගාරගත කිරීම සහ එම පුද්ගලයා බන්ධනාගාරය තුළදී මිය යෑම බරපතළ තත්වයක් බවත් ය.
අධිකරණයට අපහාස කිරීම පිළිබඳ පනත මෙලෙස අවභාවිත කිරීම, පුරවැසියන්ගේ අයිතීන් තර්ජනයට ලක්ව ඇති අතර ඒ පිළිබඳව වහාම අවශ්‍ය පියවර ගත යුතු බවද ඔහු වැඩි දුරටත් අවධාරණය කර ඇත.
මීට ප්‍රතිචාර දක්වමින් අධිකරණ අමාත්‍ය හර්ෂණ නානායක්කාර පවසා සිටියේ අධිකරණයට අපහාස කිරීම පිළිබඳ පනත සම්බන්ධයෙන් පවතින ගැටලු සාකච්ඡා කිරීම සඳහා කමිටුවක් පත් කරන බවත් නීතීඥ වෘත්තිකයින්ට ඒ වෙනුවෙන් අදහස් ඉදිරිපත් කිරීමට අවස්ථාව සලසන බවත්ය.
