සංශෝධිත ගාස්තු පිළිබඳ සාකච්ඡා පැවැත්වෙන අතරතුර, විදුලිබල මණ්ඩලයේ සභාපති තිලක් සියඹලාපිටිය බලශක්ති අමාත්‍යවරයාට ඉල්ලා අස්වීම ඉදිරිපත් කර ඇතැයි වාර්තා වේ.
පිරිවැය පිළිබිඹු කරන ගාස්තු සම්බන්ධයෙන් දේශපාලන අධිකාරියේ සහ මහජන උපයෝගීතා කොමිෂන් සභාවේ අනවශ්‍ය මැදිහත්වීම් හේතුවෙන් මෙම ඉල්ලා අස්වීම සිදුවී ඇති බව සන්ඩේ ටයිම්ස් වාර්තා කරයි.
එවකට පැවති අනුපාතයට ගාස්තුව දිගටම පැවතිය යුතු බවට වූ විදුලි බල මණ්ඩලයේ ස්ථාවරය නොතකා, මෙම වසරේ ජනවාරි මාසයේදී විදුලි ගාස්තු සියයට 20 කින් අඩු කිරීම මහජන උපයෝගීතා කොමිසම ව විසින් අනුමත කර තිිබිණි.
ජනවාරි මාසයේ ගාස්තු අඩු කිරීමෙන් පසු, 2022 ට පෙර සිදු වූ පරිදිම, ලංවිම නැවතත් පාඩු ලැබීමට පටන් ගත් බව ලංවිම අනාවරණය කර ඇත.
“2022 දී ලංවිමෙහි සමුච්චිත අලාභය රුපියල් බිලියන 473 ක්… 2022 දී, ආර්ථික බිඳවැටීමත් සමඟ, එවකට රජය, IMF කොන්දේසි වලට අනුකූලව, අවස්ථා දෙකකදී විදුලි ගාස්තු වැඩි කළා. එහි ප්‍රතිඵලයක් ලෙස, ලංවිම 2023 දී රුපියල් බිලියන 61 ක් සහ 2024 දී රුපියල් බිලියන 141 ක් ලාභ ලැබුවා. එහි ප්‍රතිඵලයක් ලෙස, 2024 අවසානය වන විට, ලංවිමෙහි සමුච්චිත අලාභය රුපියල් බිලියන 271 දක්වා අඩු වුනා. නමුත් දැන්, නැවතත්, මේ වසරේ පෙබරවාරි මාසයේ සිට, ලංවිමෙහි අලාභය රුපියල් බිලියන 271.1 සිට වැඩි වෙමින් පවතිනවා.” අර්බුදයේ තත්ත්වය පිළිබඳව විදුලි බල මණ්ඩලයේ නිලධාරියෙක් උපුටා දක්වමින් සන්ඩේ ටයිම්ස් වාර්තා කර තිබේ.
රුපියල් බිලියන 473 ක සමුච්චිත අලාභයට රාජ්‍ය බැංකුවලින් දිගුකාලීන ණය සහ අයිරා, පොලී ගෙවීම් සහ ලංකා ඛනිජ තෙල් සංස්ථාවට (CPC)ත් පෞද්ගලික විදුලි බලාගාරවලටත් ගෙවිය යුතු ගෙවීම් ඇතුළත් වේ.
