අගුණකොළපැලැස්ස බන්ධනාගාරයට අනියුක්තව සේවය කළ බන්ධනාගාර නිලධාරීන් දෙදෙනෙකුගේ හා බන්ධනාගාර රියදුරෙකුගේ වැඩ තහනමකට ලක් කළ බව බන්ධනාගාර මාධ්‍ය ප්‍රකාශක ගාමිණී බී.දිසානායක පවසයි.
පසුගිය 16 වනදා පස්වරුවේ අගුණකොළපැලැස්ස බන්ධනාගාරයට අයත් බස් රථයක් රැඳවියෙකු හා එම රැඳවියාගේ පවුලේ උදවිය සමග වැලිගම නගරයෙන් බැහැර ස්ථානයක නවතා තැබීමේ සිදුවීමකට අදාළව සිදුකෙරෙන මුලික පරික්ෂණයට සහායක් වශයෙන් මෙම ක්‍රියාමාර්ගය ගත් බව ඔහු වැඩිදුරටත් පවසයි.
මෙම බන්ධනාගාර බස් රථය රැඳවියෙකු සමග වැලිගම දුම්රියපොළට ආසන්නව නවතා අනතුරුව බස් රථයේ ආරක්ෂාවට සිටි බන්ධනාගාර නිලධාරීන් රැඳවියා බස් රථයේ තබා වැලිගම නගරයේ වෙළෙඳසැල් වෙත ගොස් ඔවුන්ට අවශ්‍ය ද්‍රව්‍ය මිලදී ගන්නා ආකාරයත් අනතුරුව ටික වේලාවකට පසුව එම ස්ථානයෙන් අදාළ බස් රථය පිටව ගොස් ඇති බවත් එම අවස්ථාවේදී බන්ධනාගාර බස් රථය තුළ කිසියම් කන්තාවක් හා කුඩා දරුවකු සිටි බවට වාර්ථා වූ බවත් ඔහු සඳහන් කර සිටියේය.
ඒ අනුව සිදුකළ පරීක්ෂණවලදී මෙම බස් රථය අගුණකොළපැලැස්ස බන්ධනාගාරයට අයත් බස් රථයක් බවත් අගුණකොළපැලැස්ස බන්ධනාගාරයේ සිටි රැඳවියෙකු කරාපිටිය රෝහලේ සායනයක් වෙත රැගෙන ගොස් නැවත පැමිණෙමින් සිටින අවස්ථාවේදි මෙලෙස එම බස් රථය වැලිගම නගරයෙන් බැහැර ස්ථානයක නතර කොට තිබී ඇති බවට අනාවරණය වූ බවත් බන්ධනාගාර මාධ්‍ය ප්‍රකාශක ගාමිණී බී. දිසානායක පවසයි.
මෙම බස් රථයේ සිටි දරුවා සහ කාන්තාව බස් රථය තුළ සිටි රැඳවියාගේ පවුලේ උදවිය බවට තොරතුරු ලැබී ඇති බවත් එම පවුලේ උදවිය බස් රථයට නංවා ගැනීමෙන් අනතුරුව මෙලෙස බන්ධනාගර නිලධාරින් බස් රථයෙන් බැස ගොස් ඇත්ද යන්න හා කාන්තාව හා දරුවන් බස් රථයට නංවා ගැනීම සම්බන්ධයෙන් CCTV දර්ශන සහ බුද්ධි නිලධාරින් යොදවා වැඩිදුර විමර්ශන සිදුකරමින් පවතින බවද බන්ධනගාර මාධ්‍ය ප්‍රකාශකවරයා වැඩිදුරටත් පවසා ඇත.
