වත්මන් ආණ්ඩුව තීරු බදු ගැටලුව සම්බන්ධයෙන් ඇමෙරිකා ජනාධිපති ඩොනල්ඩ් ට්‍රම්ප්ට ලිපියක් යැවූ නමුත් එයට ඇමරිකාවෙන් පිළිතුරක් ලැබී නොමැති බව පාර්ලිමේන්තු මන්ත්‍රී නාමල් රාජපක්ෂ පවසයි.
ආණ්ඩුවේ ප්‍රතිපත්ති බැලූ විට ලංකාවේ නිෂ්පාදන විදේශ වලට යැවීමට වඩා විදේශවල නිෂ්පාදන මෙරටට ගෙන්වා ගැනීම සඳහා අවධානය යොමු කර තිබෙන බව අද (22) පාර්ලිමේන්තුව අමතමින් ඔහු සඳහන් කලේය.
එමෙන්ම වත්මන් ආණ්ඩුව බලයට පැමිණීමට පෙර ලබා දුන් පොරොන්දු මේ වන විට වෙනස් වී ඇති බවද ඔහු එහිදී පැවසීය.
ඒ පිළිබඳ වැඩිදුරටත් අදහස් දැක්වූ නාමල් රාජපක්ෂ :
“ආණ්ඩුවේ ප්‍රතිපත්ති බැලූ විට ලංකාවේ නිෂ්පාදන විදේශ වලට යවනවාට වඩා විදේශ වල නිෂ්පාදන ලංකාවට ගෙන්වා ගැනීම සඳහා අවධානය යොමු කර තිබෙනවා. ඔබලා බලයට එන්න පෙර කළ ප්‍රකාශ බලයට ආ පසු වෙනස් වී තිබෙනවා. අද වනවිට හාල් පිටරටින් ගේනවා පමණක් නොව මේ වන විට ධීවර ගොවි සහනාධාරය වෙලාවට දෙන්නට නොහැකි වී තිබෙනවා. මේ කන්නයේදිත් පහුගිය ආණ්ඩු වලට චෝදනා කරනවද? අවංකව උත්තර හොයනවද? කජු කනවා වගේ ලුණු කන්නේ නෑ කියලා තර්කයක් ගේන්න පුළුවන්. ඒත් ලුණු අවශ්‍යයි. ඩයස්පෝරාවට එක පොරොන්දුවක් දීලා බලයට ඇවිත් තව එකක් කරනවා”
