ඉන්දියාවේ තෙලන්ගානා ප්‍රාන්තයේ හයිද්‍රාබාද් හි පැවැත්වෙන 2025 ලෝක රූ රැජින තරගය අතරවාරයේ තමන් අපහසුතාවට පත් වූ බවට එක්සත් රාජධානිය නියෝජනය කළ එංගලන්ත රූ රැජිනවන මිල්ලා මාගී කළ චෝදනා සහ ප්‍රකාශයන් සම්පූර්ණයෙන්ම පදනම් විරහිත බව “ලෝක රූ රැජින” සංවිධානය පවසයි.
“ලෝක රූ රැජින” සංවිධානයේ සභාපති සහ ප්‍රධාන විධායක නිලධාරිනී ජූලියා මෝර්ලි මේ සම්බන්ධයෙන් අදහස් දක්වමින් පවසා ඇත්තේ මිලා මාගී සහ ඉන්දියාවේ දැනට පැවැත්වෙන 72 වන ලෝක රූ රැජින උළෙලෙන් ඇය ඉවත්වීම ගැන බ්‍රිතාන්‍ය පුවත්පත්වල සංසරණය වන මෑත කාලීන මාධ්‍ය වාර්තා පිළිබඳව ලෝක රූ රැජින සංවිධානය අවධානය යොමු කර ඇති බවයි.
එංගලන්ත රූ රැජිනවන මිල්ලා මාගී 2025 ලෝක රූ රැජින තරගයෙන් ඉවත්ව යෑම සම්බන්ධයෙන් අදහස් දක්වමින් ජූලියා මෝර්ලි පවසා ඇත්තේ, මාගීගේ මවගේ සෞඛ්‍යය සම්බන්ධ වාර්තා වූ පවුල් හදිසි අවස්ථාවක් හේතුවෙන් තරඟයෙන් ඉවත් වන ලෙස මිලා මාගී ඉල්ලා සිටි බවත් මවක් සහ මිත්තණිය කෙනෙකු ලෙසත්, ලෝක රූ රැජින තරගාවලියේ සභාපතිනිය ලෙස තමන් මිලාගේ තත්ත්වයට අනුකම්පාවෙන් ප්‍රතිචාර දක්වමින් ඇගේ පවුලේ අයගේ යහපැවැත්මට මුල් තැන දෙමින් වහාම ඇයට නැවත එංගලන්තයට යාමට අවස්ථාව සලසා දුන් බවය.
ඉන් පසු Miss world 2025 තරගය සඳහා එක්සත් රාජධානිය නියෝජනය නියෝජනය කිරීමට Miss England 2024 අනුශූරිය වූ චාලට් ග්‍රාන්ට් ඉදිරිපත් වූ බව ජූලියා මෝර්ලි පවසයි.
මේ අතර, මිලා මාගී විසින් ඉන්දියාවේ අත්දැකීම් සම්බන්ධයෙන් කරන ලද අසත්‍ය සහ අපහාසාත්මක ප්‍රකාශ එක්සත් රාජධානියේ ඇතැම් මාධ්‍ය ආයතන විසින් ප්‍රකාශයට පත් කර ඇති බව ඇය පවසයි.
ඇය පවසා ඇත්තේ මිලා මාගීගේ මෙම ප්‍රකාශයන් සම්පූර්ණයෙන්ම පදනම් විරහිත සහ අපත් සමඟ ඇය ගත කළ කාලය පිළිබඳ යථාර්තය මෙම ප්‍රකාශයන්ට පටහැනි බවය.
එමෙන්ම ඇය වැඩිදුරටත් පවසා ඇත්තේ “ලෝක රූ රැජින තරගය” සත්‍යය, ගෞරවය සහ අරමුණක් සහිත සුන්දරත්වයේ වටිනාකම් සඳහා කැපවී සිටන බවයි.
එබැවින් මෙවැනි චෝදනා හෝ පුවත් පලකිරීමට පෙර එහි සත්‍යතාවය මෙන්ම තොරතුරු වල ඇති නිරවද්‍යතාවය සම්බන්ධයෙන් ද විශේෂ අවධානයක් යොමු කරන ලෙස ඇය ඉල්ලා සිටියි.
