පුද්ගලයින් 23 දෙනෙකුට දිවි අහිමි කරමින් පසුගියදා කොත්මලේ ගැරඬිඇල්ල ප්‍රදේශයේ සිදු වූ මාරක අනතුර සම්බන්ධ වාර්තාව නිකුත් කර ඇත.
කතරගම සිට මහනුවර හරහා කුරුණෑගල බලා ධාවනය කෙරුණු කතරගම ඩිපෝවට අයත් ලංගම බස් රථයක් කොත්මලේ ගැරඬිඇල්ල ප්‍රදේශයේදී අඩි 100ක පමණ ප්‍රපාතයකට පෙරළී මාරක අනතුරක් සිදුවූයේ ඉකුත් 11 වැනිදා වන අතර එම අනතුරින් පුද්ගලයින් 23 දෙනෙකු ජීවිතක්ෂයට පත්වූ අතර තුවාල ලැබූ ගණන 60කි.
අනතුරට හේතුව ලෙස එම වාර්තාවේ 24 සහ 25 වැනි පිටුවල සඳහන් වන්නේ මෙසේය,
මෝටර් වාහන පනතේ අංක 169/1 සහ 169/2 වගන්ති අනුව පැය හතරහමාරක් සඳහා පැය භාගයකට නොඅඩු කාලසීමාවක් විවේක ගත යුතු බව සඳහන් ඇත. විවේකය පැය භාගයකට අඩුවන්නේ නම් ධාවනය කල මුළු කාලය අඛන්ඩ කාලය ලෙස සැලකිය යුතුය.
ලබාගත් තොරතුරු අනුව රියදුරු වැලිමඩදී විවේක ගෙන ඇත්තේ පැය භාගයකට අඩු කාලයකි (විනාඩි 15ක් පමණ)
ඒ අනුව අනතුර සිදුවන විට රියදුරු පැය හයහමාරකට අධික කාලයක් අඛණ්ඩව රිය ධාවනයේ යෙදී ඇත. ඒ අනුව මෝටර් වාහන පනතේ උක්තවගන්ති රියදුරු විසින් උල්ලංඝණය කර ඇත.
අනතුරට බලපෑ අනෙකුත් හේතු :
මෙම අනතුරට හේතු වූ සියළු කාරණා සඳහා රියදුරු තනිව වගකිය යුතු නැත.
- මාර්ගය දෙපස Reservation ඉඩම් වල වෙළඳසැල් ඉදිකිරීම
අනතුර වූ ස්ථානය දෙපස මාර්ග සංවර්ධන අධිකාරියේ බල සීමාව තුල (R.D.A-Reservation Area ) ලෑලි කඩ 02 ක් ඇත (ගම්පල දෙසට මෙවැනිම කඩ කිහිපයක් ඇත). එම කඩදෙක අතර පරතරය අඩි 50 ක් පමණ වේ. අනතුර සිදුවී ඇත්තේ මෙම කඩ 02 අතරිනි.
පාරේ වම් පස අයිත ප්‍රපාතය දක්වා එළිපෙහෙලි කර මාර්ගය අයිනේ තිබූ පස් ගොඩැලි සමතලා කර මෙම කඩ ඉදිකිර පාරිභෝගිකයන්ගේ වාහන නැවැත්වීම සඳහා ඉඩ ප්‍රස්ථාව සකස් කොට දී ඇත. එම හේතු කොට ගෙන මෙම ප්‍රපාතයේ අවධානම් තවදුරටත් තීවුර කර ඇත. එම කඩ ඉදිකිරීමට පෙර එම ස්ථානයේ පස්ගොඩැලි සහ කුඩා ගස් තිබී ඇති බව පැරණි ඡායරූප මඟින් තහවුරු වේ.
එම පස් ගොඩැලි තිබුනේ නම් සහ කුඩා ගස් වැවී තිබුනේ නම් මෙම අනතුර සිදු නොවීමට ඉඩ තිබුණි.මාර්ග සංවර්ධන අධිකාරිය සතු භූමියක් නිසි අධ්‍යයනයකින් හා අවසරයකින් තොරව එවැනි සංවර්ධන කටයුතු සඳහා අවසර ලබාදීම පිළිබඳ සොයා බැලිය යුතු කරුණකි.”
