රජය විසින් පනවා ඇති බදු ප්‍රතිශත ඉදිරි කාලයේදී හෝ අඩු කිරීමට හැකියාවක් ලැබෙන්නේ බදු නොගෙවන හෝ පැහැර හරින පිරිස් බදු පදනමට යොමු කර ඒ හරහා බදු පදනම ශක්තිමත් කළහොත් පමණක් බව දේශීය ආදායම් දෙපාර්තමේන්තුවේ නියෝජ්‍ය කොමසාරිස් ජනරාල් පී.කේ.එස්. ශාන්ත පවසයි.
එම නිසා බදු ගෙවිය යුතු පිරිස් ඔවුන්ගේ යුතුකම නිසි පරිදි ඉටු කරන්නේ නම් දැනට ඇති සියයට 18 වැට් බද්ද සියයට 10 දක්වා අඩු කිරීමට පවා හැකියාවක් ලැබෙනු ඇතැයිද නියෝජ්‍ය කොමසාරිස් ජනරාල්වරයා සදහන් කරයි.
ඔහු මේ බව ප්‍රකාශ කළේ රජයේ ප්‍රවෘත්ති දෙපාර්තමේන්තුවේදී ඊයේ (29) පැවැති “බදු ශක්ති” ජාතික බදු සතිය සම්බන්ධයෙන් දැනුවත් කිරීමේ මාධ්‍ය හමුවේදීය.
මේ සඳහා දේශීය ආදායම් දෙපාර්තමේන්තුවේ, රේගු දෙපාර්තමේන්තුවේ සහ සුරා බදු දෙපාර්තමේන්තුවේ නියෝජිතයෝ සහභාගී වූහ.
එහිදී අදහස් දැක් වූ දේශීය ආදායම් දෙපාර්තමේන්තුවේ කොමසාරිස් ජනරාල් ආර්.පී.එච්. ප්‍රනාන්දු :-
මෙම දෙපාර්තමේන්තුවට ඉතිහාසයේ වාර්තාගත ආදායම් ඉලක්කයක් ලබා ගැනීම සඳහා මේ වසරේ නියමිත වෙලා තියෙනවා. රුපියල් බිලියන 2195ක වාර්තාගත බදු ආදායම් ඉලක්කයක්. මෙම ඉලක්කය ළඟා කරගන්න දෙපාර්තමේන්තුව මෙම බදු සතිය තුළදී බදු අනුකූලතාව වර්ධනය කර ගන්නත්, බදු ගෙවන්නන් ලියාපදිංචිකර ගන්නත් වැඩසටහන් සූදානම් කර තිබෙනවා. පළමුව අපි අඟහරුවාදා දිවයිනම ආවරණය වන පරිදි ප්‍රධාන කාර්යාලයේ සහ ප්‍රාදේශීය කාර්යාල 20ත් එකතු කරගෙන දිවයිනේ හඳුනා ගත් ස්ථානවලදී බදු ගෙවන්නන්, බදු උපදේශකවරු සහ රජයේ නිලධාරින් දැනුවත් කිරීමේ විශේෂ වැඩසටහන් ක්‍රියාත්මක කරනවා. ඒ වගේම මේ වනවිට මිලියන 10කට වැඩි පිරිසක් ටින් අංකය නිකුත් කරලා තියෙනවා. මේ සතිය තුළ ටින් අංකය ලබා නොගත් අයට ලබාගන්න පුළුවන්.
අදහස් දැක් වූ ශ්‍රී ලංකා රේගු දෙපාර්තමේන්තුවේ අධ්‍යක්ෂ ජනරාල් පී.බී.එස්.සී. නෝනිස් :-
පසුගිය වසර තුනක් තුළ ශ්‍රී ලංකා රේගු දෙපාර්තමේන්තුවට ලැබුණු ආදායම් ඉලක්කයන් සපුරලා තියෙනවා. ඒ අනුව 2024 අපි රුපියල් බිලියන 1535ක් ළඟාකර ගන්න හැකි වුණා. අපිට ලබා දීලා තිබුණේ රුපියල් බිලියන 1533ක ඉලක්කයක්. කොහොම වුණත් 2025 වසරට අපිට රුපියල් බිලියන 2115ක ඉලක්කයක් තියෙනවා. රේගු බදු නොගෙවන පුද්ගලයන් හඳුනාගෙන ඔවුන් මේ සඳහා යොමු කිරීම හරහා අපිට එම ඉල්ලක්කය ළඟා කරගන්න පුළුවන්. රේගු බදු නොගෙවන පුද්ගලයන් පිළිබඳව අපිට තොරතුරු ලබා දුන්නොත් එලෙස තොරතුරු ලබා දෙන්නන්ගේ අනන්‍යතාව ආරක්ෂා කරගෙන ඔවුන්ට ප්‍රසාද දීමනා ලබා දෙනවා. එම තොරතුරු අපේ විශේෂ විමර්ශන අංශයට ලබා දිය හැකිය.
ශ්‍රී ලංකා රේගු දෙපාර්තමේන්තුවේ අතිරේක අධ්‍යක්ෂ ජනරාල් එස්.පී. අරුක්ගොඩ :-
මෙම ජාතික බදු සතිය තුළ ශ්‍රී ලංකා රේගු දෙපාර්තමේන්තුව විසින් පස් වැදෑරුම් වැඩපිළිවෙළක් ක්‍රියාවට නැංවීමට තීරණය කරලා තිබෙනවා. ඉන් පළමු වැන්න ජාත්‍යන්තර වෙළෙඳාම පහසු කිරීම සඳහා ආනයනකරුවන් සහ අපනයනකරුවන් වෙත තොරතුරු තාක්ෂණය මත පදනම් වූ විසඳුම් කිහිපයක් ලබා දීලා තියෙනවා. ඉන් පළමු වැන්න තමයි ආසි හබ් වැඩසටහන. මේ තුළින් යම්කිසි ආනයනකරුවකුගේ භාණ්ඩ ලංකාවට ගොඩබාන්න කලින් රේගු කටයුතු සියල්ලම අවසන් කිරීමේ හැකියාව තියෙනවා. දැනට සිදුවන්නේ භාණ්ඩ ගොඩ බෑවට පස්සේ තමයි රේගු කටයුතු ආරම්භ වෙන්නේ. නමුත් ආසි හබ් වැඩසටහන තුළින් අපි බලාපොරොත්තු වෙනවා ආනයනකරුවන්ට තමන්ගේ භාණ්ඩ ලංකාවට එන්න කලින් රේගු කටයුතු සියල්ල නිම කරලා ගොඩ බෑවට පස්සේ කෙළින්ම තමන්ගේ ව්‍යාපාර ස්ථානයට රැගෙන යන්න පුළුවන්. මින් වියදම පවා අඩු වෙනවා. දෙවැන්න තමයි ස්වයංක්‍රීය අවදානම් කළමනාකරණ පද්ධතියක් අපි හඳුන්වා දීමට අපි සූදානම් කරලා තියෙනවා. මේ සඳහා තොරතුරු තාක්ෂණ පද්ධතිය හරහා මිනිස් සම්බන්ධතාවකින් තොරව ඒ භාණ්ඩ තෝරා ගැනීම සිදු වෙනවා. ඒ වගේම ශ්‍රී ලංකා රේගුව තුළදී ආනයනයක් ගැන ලියවිලි සම්මත වෙන අවස්ථාවකදී ඒවා මොන අවස්ථාවේද තියෙන්නේ කියලා නිවසේ සිට ජංගම දුරකථනය හරහා පරික්ෂා කිරීමේ පහසුකමක් සලසා දී තියෙනවා. ඒ වගේම motor vehicle verification application එකක් හඳුන්වා දෙනවා. ඔබට ලංකාව තුළදී මෝටර් රථ වාහනයක් මිලදී ගන්නවා නම් එම මෝටර් රථය නිවැරැදිව තීරුබදු ගෙවලා ලංකාවට ආනයනය කරලා තියෙනවාද නැද්ද කියලා ඔබට නිවසේ සිටම බලාගන්න පුළුවන්.
දෙවැන්න තමයි රේගු නීති සහ ක්‍රියාපටිපාටිය සම්බන්ධයෙන් වැඩමුළු සංවිධානය කර තියෙනවා. තුන්වැනි එක තමයි රේගු කටයුතු පිළිබඳ ඇති ගැටලුවක් තියෙනවා නම් ඒ සඳහා විසඳුම් ලබාදීම සඳහා අපි රේගුව සමග අනිකුත් රාජ්‍ය ආයතන එකතුව එක් ස්ථානයකට රැස් වෙලා ආනයනකරුවන්ගේ සහ අපනයනකරුවන්ගේ ගැටලු සඳහා එවලේම විසඳුම් ලබාදීමේ අවස්ථාවක් මේ සතිය පුරාම ක්‍රියාත්මක කරනවා. ඒ වගේම රේගු බදු වංචාකරුවන් හඳුනා ගැනීම සඳහා මහජනතාවගෙන් සහය ලබා ගැනීම සහ ඔවුන් වෙත ගෙවන ත්‍යාග දීමනා පිළිබඳව තොරතුරු ඉදිරිපත් කරලා ඒ වෙත නැඹුරු කර ගැනීමට විශේෂ වැඩසටහනක් ක්‍රියාත්මක කරනවා. දැනටමත් රේගු වංචාව ගැන තොරතුරක් ලබා දුන්නොත් ඒ තොරතුරු සත්‍ය නම් අදාළ භාණ්ඩවල වටිනාකමින් සියයට 30ක මුදලක් අපි ත්‍යාගයක් වශයෙන් තොරතුරු ලබාදෙන කෙනාට ලබා දෙනවා. මීට මාස එක හමාරකට කලින් රුපියල් ලක්ෂ 140ක් පුද්ගලයකුට ගෙව්වා. මෙය සමස්ත මහජනතාවටම විවෘතයි
