Starlink චන්ද්‍රිකා අන්තර්ජාල සේවා ශ්‍රී ලංකාව තුල දියත් කිරීමට සූදානම් බවත්, ඒ සදහා අවශ්‍ය රජයේ අනුමැතිය සහ නියාමන ක්‍රියාවලීන් මේ වනවිට අවසන් වී ඇති බවත් ඩිජිටල් ආර්ථික නියෝජ්‍ය අමාත්‍ය එරංග වීරරත්න පවසයි.
2025 ආසියානු තාක්ෂණ සමුළුවට සමගාමීව සිංගප්පූරුවේ පැවති රැස්වීමකදී ඔහු මේ බව පැවසීය.
සිංගප්පූරුවේ ශ්‍රී ලංකා මහ කොමසාරිස් කාර්යාලය විසින් සංවිධානය කරන ලද මෙම රැස්වීමේදී නියෝජ්‍ය අමාත්‍ය වීරරත්න සහ එක්සත් ජනපද රාජ්‍ය දෙපාර්තමේන්තුවේ ජාත්‍යන්තර සන්නිවේදන සහ තොරතුරු ප්‍රතිපත්ති සම්බන්ධීකාරක එක්සත් ජනපද තානාපති ස්ටෙෆාන් ලැන්ග් එක් විය.
Starlink මෙහෙයුම් දියත් කිරීම ඉදිරියට ගෙන යාම සඳහා රජය Starlink වෙතින් අවසන් උපකරණ පුවරු දත්ත බලාපොරොත්තුවෙන් සිටින බව නියෝජ්‍ය අමාත්‍ය වීරරත්න සඳහන් කරයි. එය ලැබුණු පසු සේවාවන් ප්‍රමාදයකින් තොරව ආරම්භ කළ හැකි බවද ඔහු පැවසීය.
ගූගල් සහ මෙටා වැනි එක්සත් ජනපද තාක්ෂණික දැවැන්තයින්ගේ සහාය, දේශීය දත්ත මධ්‍යස්ථාන පිහිටුවීම සහ AI සහ සයිබර් ආරක්ෂණ යටිතල පහසුකම් ඒකාබද්ධ කිරීම ඇතුළු පුළුල් ඩිජිටල් සහයෝගීතාවයක් ද මෙම රැස්වීමේදී ආවරණය වි ඇති බව වාර්තා වේ.
තානාපති ලැන්ග් ශ්‍රී ලංකාවේ ඩිජිටල් පරිවර්තනය සඳහා එක්සත් ජනපදයේ පූර්ණ සහයෝගය ලබා දෙන බව සහතික කළ අතර මෙම උපායමාර්ගික මුලපිරීම් ක්‍රියාත්මක කිරීමේ හදිසිභාවය සහ වැදගත්කම වැඩිදුරටත් ඉස්මතු කර ඇත.
