ඉඩම් ආරවුලක් සම්බන්ධයෙන් නඩු වාර්තාවක පිටපතක් ලබා දීමට අල්ලස් ගැනීමේ චෝදනාව මත අධිකරණ නිලධාරියෙකු අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිසම පවසයි.
මෙලෙස අත්අඩංගුවට ගෙන ඇත්තේ, බලපිටිය මහේස්ත්‍රාත් උසාවියේ සිතාසි සහ ඇස්කිසි ක්‍රියාකරුවෙකි.
ඒ, අම්බලන්ගොඩ ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුවයි.
ඉඩම් භුක්තිය සම්බන්ධව ඇති වූ ආරවුලක් පිළිබඳව බලපිටිය මහේස්ත්‍රාත් අධිකරණයේ, පැමිණිලිකරු විසින් පුද්ගලිකව පවරන ලද නඩුවකට අදාළ තීන්දුව පැමිණිලිකරුහට අවාසි ලෙස ලැබීමෙන් පසුව නැවත මහාධිකරණයේ අභියාචනය කිරීම සඳහා නීතිඥවරයාගේ උපදෙස් පරිදි ඉහත නඩුවට අදාළ සම්පූර්ණ නඩු වාර්තාවේ පිටපතක් ලබා දීමට රජයේ ගාස්තුවට අමතරව අල්ලස් ලෙස රු.5,000/- ක (රුපියල් පන්දහසක) මුදලක් අයැද භාරගැනීමේ චෝදනාව අධිකරණ නිලධාරියාට එල්ල වී ඇත.
පසුගිය 05 වනදා දහවල් 12:23 ට පමණ අධිකරණ සංකීර්ණය තුළ සිද්ධියට සම්බන්ධ අධිකරණ නිලධාරියාව අත්අඩංගුවට ගෙන තිබේ.
