මාධ්‍යවේදී ප්‍රගීත් එක්නැලිගොඩ පැහැරගෙන යෑම, ඝාතනය කිරීම සහ අතුරුදහන් කිරීම සම්බන්ධ මහාධිකරණ නඩු විභාගයේ ප්‍රධාන විත්තිකරු වන යුද හමුදා බුද්ධි අංශයේ විශ්‍රාමික බ්‍රිගේඩියර් ෂම්මි කුමාරරත්න, නඩුවේ ප්‍රධාන සාක්ෂිකරුවකුට තර්ජනය කිරීමේ චෝදනාව මත අත්අඩංගුවට ගෙන ඇති බව වාර්තා වේ.
සැකකරු ඊයේ (11) ත්‍රිකුණාමලය මහේස්ත්‍රාත් අධිකරණයට ඉදිරිපත් කරන ලද අතර පසුව මේ මස 25 වැනි දින දක්වා රිමාන්ඩ් භාරයට පත් කරන ලදී.
මාධ්‍යවේදී ප්‍රගීත් එක්නැලිගොඩ 2010 ජනවාරි 24 වැනි දින අතුරුදහන් වූ අතර එතැන් සිට කරන ලද පරීක්ෂණවලින් හෙළි වී ඇත්තේ ඔහු පැහැරගෙන ගොස් ඝාතනය කර ඇති බවයි.
මෙම නඩුව සම්බන්ධයෙන්, නීතිපතිවරයා විසින් විශ්‍රාමික බ්‍රිගේඩියර් ෂම්මි කුමාරරත්න ඇතුළු පුද්ගලයන් දස දෙනෙකුට එරෙහිව කොළඹ ස්ථිර ත්‍රිපුද්ගල මහාධිකරණය හමුවේ අධිචෝදනා ගොනු කර ඇති අතර ඒ අනුව නඩු විභාගය දැනට සිදුවෙමින් පවතියි.
සිද්ධිය වන අවස්ථාවේ චූදිතයන්ගෙන් බොහෝ දෙනෙක් හමුදා බුද්ධි අංශයේ සේවය කරමින් සිට ඇත.
වින්දිතයන් සහ සාක්ෂිකරුවන් ආරක්ෂා කිරීමේ අධිකාරියේ විමර්ශන ඒකකයේ ප්‍රධානියා ත්‍රිකුණාමලය මහේස්ත්‍රාත් අධිකරණයට දැනුම් දුන්නේ, එක්නැලිගොඩ නඩුවේ ප්‍රධාන සාක්ෂිකරුවකු වන සුරේෂ් කුමාර්ට විශ්‍රාමික බ්‍රිගේඩියර් කුමාරරත්න විසින් කිහිප වතාවක්ම තර්ජනය කර ඇති බවයි.
විශ්‍රාමික බ්‍රිගේඩියර්වරයාගේ පෞද්ගලික දුරකථන අංකය භාවිත කරමින් තර්ජන එල්ල කර ඇති බව අනාවරණය වි ඇත.
මීට අමතරව, ජුනි 6 වැනි දින එම දුරකථන අංකයෙන්ම හිටපු හමුදා නිලධාරියකු විසින් කරන ලද තවත් තර්ජනයක් පිළිබඳ විස්තර අධිකරණයට ඉදිරිපත් කරන ලද වාර්තාවේ ඇතුළත් විය.
“හමුදා නිලධාරියකු ලෙස හඳුනාගෙන ඇති මොහොමඩ් නම් පුද්ගලයකු ඇමතුමක් ලබා දෙමින්, එල්ටීටීඊ බුද්ධි අංශ ප්‍රධානී විනයාගම් මන්නාරමට පැමිණ ඇති බවත් වරාය හරහා ආයුධ රැගෙනවිත් ඇති බවත් ප්‍රකාශ කළ බව කියනු ලැබේ. අනුර යටතේ පවතින වත්මන් රජය වැඩි කල් පවතින්නේ නැති බවත්, ඊළඟ නායකයා නාමල් රාජපක්ෂ හෝ විජේවීරගේ පුත්‍රයා වනු ඇති බවත් ඔහු තවදුරටත් කියා සිටියේය. එල්ටීටීඊ තර්ජනයක් පිළිබඳ ඔහු අනතුරු ඇඟවූ අතර සාක්ෂිකරුට කොළඹට පැමිණ තමා සමඟ රැඳී සිටින ලෙස ඉල්ලා තිබේ. මෙම පැමිණිල්ල ඉච්චලම්පත්තු පොලිස් ස්ථානයේ ගොනු කර ඇති අතර එය භාර නිලධාරියා විසින් වාර්තා කරන ලදී.”
සාක්ෂිකරුවන් බිය ගැන්වීමට භාවිත කළ දුරකථන අංකය විමර්ශනය කර සත්‍යාපනය කර ඇති බව විමර්ශන ඒකකයේ ප්‍රධානියා අධිකරණයට තහවුරු කළේය.
මෙම කරුණු සළකා බැලූ ත්‍රිකුණාමලය මහේස්ත්‍රාත් අධිකරණය විශ්‍රාමික බ්‍රිගේඩියර් ෂම්මි කුමාරරත්න 25 වැනි දින දක්වා රක්ෂිත බන්ධනාගාර ගත කිරීමට නියෝග කළ අතර, දැනට පැවැත්වෙන නඩු විභාගය සඳහා 13 වැනි දින ස්ථිර ත්‍රිපුද්ගල මහාධිකරණයට ඉදිරිපත් කරන ලෙස උපදෙස් දී ඇත.
