ඉරානයේ න්‍යෂ්ටික මධ්‍යස්ථාන ඉලක්ක කර ගනිමින් ප්‍රහාර එල්ල කළ බව ඊශ්‍රායල් ආරක්ෂක බළකාය පවසයි.
ඊශ්‍රායල අගමැති බෙන්ජමින් නෙතන්යාහු පවසන්නේ, මෙම ප්‍රහාර ‘ඔපරේෂන් රයිසින් ලයන් මෙහෙයුමේ’ කොටසක් බවත් ඉරානය ‘ඊශ්‍රායලයේ පැවැත්මට’ තර්ජනයක් බවත් ය.
විදෙස් මාධ්‍ය වාර්තා කර ඇත්තේ, නුදුරුදී ම මෙම ප්‍රහාරයට ප්‍රතිප්‍රහාර අපේක්ෂා කරන බව පවසමින් ඊශ්‍රායලය එරට හදිසි තත්ත්වයක් ප්‍රකාශයට පත් කර ඇති බවයි.
ඉරාන රජයේ රූපවාහිනි සේවය සඳහන් කර ඇත්තේ, ටෙහෙරාන් නගරය ආසන්නයේදී මෙම ප්‍රහාරය එල්ල වී ඇති බවත් මියගිය පුද්ගලයන් අතර අතර ළමුන් ඇතුළුව සිවිල් වැසියන් සිටින බවත් ය.
එමෙන්ම, මෙම ප්‍රහාරයෙන් ඉරාන ඉස්ලාමීය විප්ලවවාදී ආරක්ෂක බලකායේ (IRGC) අණදෙන නිලධාරී ජෙනරාල් හුසේන් සලාමී ජිවිතක්ෂයට පත්වී ඇතැයි විදෙස් මාධ්‍ය සඳහන් කර ඇත.
ඊශ්‍රායල එල්ල කළ මෙම ප්‍රහාරයට සහාය දුන් බවට ඉරානය ඇමරිකා එක්සත් ජනපදයට චෝදනා කර ඇත.
ප්‍රහාරය ගැන දැන සිටි නමුත් එක්සත් ජනපදය මෙම ප්‍රහාරයට සම්බන්ධ නොවූ බව අවධාරණය කරන බව ඇමෙරිකාවේ ජනාධිපති ඩොනල්ඩ් ට්‍රම්ප් සඳහන් කර ඇති බවද විදෙස් මාධ්‍ය වැඩි දුරටත් පවසයි.
