බෝම්බ බියක් වාර්තා වීම හේතුවෙන් ෆුකෙට් දූපතේ සිට නවදිල්ලිය බලා ගමන් ආරම්භ කර තිබු එයාර් ඉන්දියා ගුවන්යානයක් (AI 379) ආපසු ගුවන්තොටුපොළ වෙත හරවා යවා ඇති බව විදෙස් මාධ්‍යය වාර්තා කරයි.
අද (13) උදෑසන අදාළ ගුවන්යානය මෙලෙස හරවා යවා ඇති බවයි එම මාධ්‍ය වාර්තා කරන්නේ.
බෝම්බ බියක් ඇති බවට යානයේ නියමුවා එරට වේලාවෙන් උදෑසන 9.30ට පමණ ගුවන් ගමනාගමන පාලක මැදිරියට දැනුම් දුන් බව ෆුකෙට් ජාත්‍යන්තර ගුවන්තොටුපොළ වාර්තා කර ඇති අතර ඒ අනුව ගුවන්යානය හදිසි ගොඩබෑමකට අවසර ලබාදී ඇත.
මගීන් 156 දෙනෙකු රැගත් ගුවන්යානය එරට වේලාවෙන් උදෑසන 9.15ට ගුවන් ගතවී ඇති අතර, එය උදෑසන 11.38ට ආරක්ෂිතව ගොඩ බස්වා තිබේ.
විදෙස් මාධ්‍ය වාර්තා කළේ, ෆුකෙට් ගුවන්තොටුපළ තුළ හදිසි අවස්ථාවක් සඳහා සූදානම් බවයි.
