ජනාධිපති අනුර කුමාර දිසානායක විසින් ශ්‍රේෂ්ඨාධිකරණයේ විනිසුරු ධූරයක් සඳහා ව්‍යවස්ථා සභාවට යෝජනා කර තිබු අභියාචනාධිකරණයේ වැඩබලන සභාපති විනිසුරු එම්.ටී. මොහොමඩ් ලෆාර් තාහීර්ගෙ නම ඉවත් කර ගැනීමට ආණ්ඩු පක්ෂය නියෝජනය කරමින් සභානායක බිමල් රත්නායක පියවර ගෙන ඇති බව විශ්වාසවන්ත ආරංචි මාර්ග පවසයි.
කෙසේ වෙතත්, එම ඉවත් කර ගැනීම තාවකාලික ඉවත් කරගැනීමක්ද, නැවත එම නම යොමු කිරීමට බලාපොරොත්තු වෙනවාද යන්න තවමත් තහවුරු නැත.
වැඩබලන සභාපති විනිසුරු ලෆාර්ගේ නම යෝජනා කිරීම පිළිබඳව සාකච්ඡාව මතු වූ මොහොතේ විපක්ෂයේ විරෝධයක් මතු වී තිබුණි.
කෙසේ නමුත්, එම්.ටී. මොහොමඩ් ලෆාර්ව ශ්‍රේෂ්ඨාධිකරණයට පත් කිරීමට අගවිනිසුරුවරිය නිර්දේශ කර තිබුණේ නැත.
එම පත් කිරීමට ඇය ලිඛිත විරෝධය දක්වා තිබුණු අතර ආණ්ඩුක්‍රම ව්‍යවස්ථා සභාවේ සාමාජිකයෙකු ප්‍රකාශ කළේ අගවිනිසුරුවරිය මෙලෙස විරෝධය දැක්වීම හෝ නමක් නිර්දේශ කිරීම සාමාන්‍ය තත්වයක් බවයි.
ශ්‍රේෂ්ඨාධිකරණයේ හා අභියාචනාධිකරණයේ නව පත්වීම් සම්බන්ධයෙන් ජනාධිපතිවරයා විසින් යෝජනාකර තිබු නම් පිළිබඳව තීරණයක් ගැනීම සඳහා ආණ්ඩුක්‍රම ව්‍යවස්ථා සභාව ඊයේ (13) පස්වරු 4.00ට රැස්වූ අවස්ථාවේදී මෙලෙස ලෆාර් මහතාගේ නම ඉවත් කරගැනීම සිදු කර ඇත.
කෙසේ වෙතත් විනිසුරු ලෆාර්ගේ නම යෝජනා කර ඇත්තේ ජුනි 20 වැනිදා ඇති වීමට නියමිත පුරප්පාඩුවක් වෙනුවෙන් වීම විශේෂත්වයකි.
ජුනි 20 වැනි දින විනිසුරු ගාමිණී අමරසේකර විශ්‍රාම යාම හේතුවෙන් පුරප්පාඩු වන ශ්‍රේෂ්ඨාධිකරණ විනිසුරු ධුරය සඳහා ජනාධිපතිවරයා ජුනි 09 වැනි දින ලෆාර් තාහීර්ගේ නම යෝජනා කර ඇත.
අභියාචනාධිකරණයේ වැඩබලන සභාපති මොහොමඩ් ලෆාර් අදාල පුරප්පාඩුව ඇති වීමට පෙර, එනම් ජුනි 18 වැනිදා වයස අවුරුදු 63 සම්පූර්ණ වීම නිසා විශ්‍රාම යෑමට නියමිතව ඇත.
නමුත්, ශ්‍රේෂ්ඨාධිකරණයේ විශ්‍රාම යන වයස වන්නේ වස අවුරුදු 65 වීම නිසා ඔහුට සේවය කිරීමේ හැකියාව පවතියි.
මේ අතර අගවිනිසුරු ධුරයද ඉදිරියේදී හිස් වීමට නියමිත අතර, අභියාචනාධිකරණයේ සභාපති ධුරය සහ අගවිනිසුරු ධුරය යන ප්‍රබල තනතුරු දෙකටම පත් කළ යුතු පුද්ගලයා පිළිබඳ නීති සමාජයේ සාකච්ඡාවක් ඇති වී ඇත.
