බලංගොඩ රජවක මහ විදුහලේ ගසක අත්තක් කඩා වැටීමෙන් සිසුවකු මිය යෑම සම්බන්ධයෙන් මූලික විමර්ශනයක් සිදු කර සතියක් තුළ වාර්තාවක් ලබාදෙන ලෙස අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න නිලධාරීන්ට නියෝග කර ඇති බව වාර්තා වේ.
ඔහු මේ බව පවසා සිටි‍යේ, බෝ අත්තක් කඩා වැටීම හේතුවෙන් හානියට පත් මෙම විද්‍යාලයේ ගොඩනැගිලි නිරීක්ෂණය කිරීමේ අවස්ථාවට එක්වෙමිනි.
එහිදී අනාරක්ෂිත බවට සැක කරන ගස් පාසල් භූමිය තුළ ඇති නම් වහාම ඒ පිළිබඳ ප්‍රාදේශිය ලේකම්ට සහ දැව සංස්ථාවට දැනුම් දෙන ලෙසට අමාත්‍යවරයා උපදෙස් ලබා දී ඇත.
එමෙන්ම සබරගමුව පළාත් අධ්‍යාපන අධ්‍යක්ෂ දර්ශනී ඉද්දමල්ගොඩ සඳහන් කළේ, මෙම සිද්ධිය සම්බන්ධයෙන් විමර්ශනයට ත්‍රිපුද්ගල කමිටුවක් පත් කර ඇති බවයි.
