දීර්ඝ කාලයක් තිස්සේ නොවිසඳී ඇති පරිපාලන ගැටළු මත පදනම්ව මෙම සතියේ පැය 48 ක වෘත්තීය සමිති ක්‍රියාමාර්ගයක් දියත් කරන බව ශ්‍රී ලංකා දුම්රිය ආරක්ෂක සංගමය අද (17) නිවේදයක් නිකුත් කරමින් පවසයි.
මෙලෙස වෘත්තීය සමිති ක්‍රියාමාර්ගයට හේතු ලෙස ඔවුන් පෙන්වා දී ඇත්තේ,
1 දිස්ත්‍රික් ප්‍රවාහන පරීක්ෂක (ප්‍රවාහන/වාණිජ) තනතුර සඳහා බඳවා ගැනීමේ ප්‍රමාදයන්
2 විශේෂ නියාමන පන්තියේ උසස්වීම් ලබා දීමේ ප්‍රමාදයන්
3 විශේෂ නියාමන පන්තියේ නොවිසඳුනු වැටුප් ගැටළු
4 දෙපාර්තමේන්තු පරීක්ෂණ පැවැත්වීමේ ප්‍රමාදයන්
5 කාර්යක්ෂමතා කඩඉම් සහන ලබා දීමේ ප්‍රමාදයන්
6 ඇතැම් කාර්යාලවලට සේවකයින් පත් කිරීමට අපොහොසත් වීම
7 සුභසාධන කටයුතුවලට අදාළ ඉල්ලීම් පොරොත්තු
8 නියාමන තනතුරේ ශ්‍රී ලංකා තාක්ෂණ සේවය සඳහා භාවිතා කරන උසස්වීම් ක්‍රමය ක්‍රියාත්මක කිරීමට අනුමැතිය ඉල්ලා සිටීම
9 ශ්‍රී ලංකා පරිපාලන සේවය සඳහා අයදුම් කිරීමට තවත් අවස්ථාවක් ඉල්ලා සිටීම
යන ගැටලු සම්බන්ධයෙන් මෙම වෘත්තිය ක්‍රියාමාර්ගය ගන්නා බවත් මෙම ගැටළු පිළිබඳව අදාළ නිළධාරීන්ට දැනුම් දී ඇති බවත් ඔවුන් පවසයි.
ඒ අනුව ජුනි 20 වන සිකුරාදා මධ්‍යම රාත්‍රියේ සිට සංකේතාත්මක වැඩ වර්ජනයක් දියත් කරන බව දුම්රිය ආරක්ෂක සංගමය සිය නිවේදනයෙන් පෙන්වා දෙයි.
