සීනි බෝල වර්ගයක් ආහාරයට ගැනීමෙන් පසුව සිදු වූ බව කියන ආසාත්මිකතාවක් හේතුවෙන් ගොකරැල්ල, පොල්ගොල්ල දේවපාල විදුහලේ සිසුවියන් පිරිසක් ඊයේ (26) පෙරවරුවේ රෝහල්ගත කිරීමට කටයුතු කළ බව එහි විදුහල්පති දුනුකේදෙණියේ කුසලධම්ම හිමියන් පවසයි.
එම සීනි බෝල මිල දී ගත් බව කියන වෙළෙඳසැල මුද්‍රා තැබීමට මහජන සෞඛ්‍ය පරීක්ෂකවරුන් කටයුතු කර ඇති බවත් පොල්ගොල්ල දේවපාල විදුහල අද වසා දමා ඇති බවත් විදුහල්පති හිමියෝ පවසා ඇත.
දුනුකේදෙණියේ කුසලධම්ම හිමියන් පවසන ආකාරයට පාසලේ උදෑසන රැස්වීමෙන් පසුව සිසුවියන් කීප දෙනෙකුගේ ශරීරයේ පලු දමා කැසීම් මතුව ඇති අතර පසුව දැරිවියන් පනස් දෙනෙකුගේ පමණ එවැනි තත්ත්වයක් දකින්නට ලැබුණු නිසා ඔවුන් ගොකරැල්ල පොල්ගොල්ල රෝහලට ඇතුලත් කිරීමට විදුහලේ පාලනාධිකාරිය කටයුතු කර තිබේ.
විදුහලේ 6, 7 හා 8 ශ්‍රේණිවල දරුවන් මේ ආසාත්මිකතාවට ලක්වූ බවත් එම රෝගී දරුවන් රෝහලට ගෙන ගිය ගුරුවරියන්ටත් ඔවුන්ට ප්‍රතිකාර කළ ගොකරැල්ල රෝහලේ වෛද්‍යවරයාට හා උපස්ථායකයන් දෙදෙනකුටත් එම තත්ත්වය මතුව තිබුණු බව ද උන්වහන්සේ කීහ.
මේ අතර, තවත් සිසුවියන් පිරිසක් කුරුණෑගල රෝහලට ගිලන් රථයක් මගින් රැගෙන ගොස් ඇතුළත් කළ බව කී උන්වහන්සේ රෝගී දරුවන් ආහාරයට ගත් සැක සහිත සීනි බෝල ඇතැම් දරුවන්ගේ නිල ඇඳුමේ සාක්කුවල තිබූ බව ද පවසයි.
වැඩිදුරටත් අදහස් දක්වමින් උන්වහන්සේ කියා සිටියේ,
“පාසලේ උදෑසන රැස්වීම තිබුණේ එළියෙ. ළමයි කසන්න ගත්තා ම අපි හිතුවෙ දළඹුවො කියලා. අපි පස්සෙ ඇහුවා මොනව හරි කෑවද කියල. ටොපි කෑවා කිව්වා. ඒවා සීනිබෝල වගේ පැකට්ටුවක්. මුතු බෙල්ලන් හැඩයේ. එක ළමයකුගෙ සාක්කුවකත් තිබුණා. ඒ පන්ති කාමරෙන් පහළට එද්දි තව කණ්ඩායමක් අසනීප වෙලා. මේ විදියට ළමයි 50ක් විතර. 6, 7,8 පන්තිවල. ඒ ළමයි ගෙනියපු ගුරුවරියොත් අසනීප වුණා. රෝහලේ ඇටෙන්ඩන්ලා දෙන්නෙක් අසනීප වුණා. බෙහෙත් කළ වෛද්‍යවරයාත් අසනීප වුණා. ආණ්ඩුකාරතුමා මැදිහත් වෙලා කුරුණෑගලින් ගිලන් රථයක් එව්වා. පොල්ගොල්ල රෝහලේ අය ටිකට් කපල යැව්වා. කුරුණෑගල යැව්ව අයගෙ තත්ත්වයත් සුව අතට හැරිලා කියනවා. ළඟ වෙළෙඳසැලකින් අරන් තියෙන්නේ. සෞඛ්‍ය වෛද්‍ය නිලධාරින් ඒවා රස පරීක්ෂණයකට යවන්න ගත්තා. හෙට (27) පාසල පැවැත්වෙන්නේ නෑ. හෙට නිවාඩුයි.”
මේ සම්බන්ධයෙන් කළ විමසීමේදී පොලිස් මාධ්‍ය කොට්ඨාසය සඳහන් කළේ, පොල්ගොල්ල දේවපාල විද්‍යාලයේ දැරියන් 26 දෙනෙකු සහ ගුරුවරියන් 3ක් ටොපි වර්ගයක් ආහාරයට ගැනීමෙන් ඇතිවු ආසාදන තත්ත්වයක් නිසා හුස්ම ගැනීමේ අපහසුතා සහ කැසීම හේතුවෙන් රෝහල් ගතකර ඇති බවයි.
සිසුවියන් හත් දෙනෙකු කුරුණෑගල රෝහලේ ප්‍රතිකාර ලබන බව ඊයේ සවස 5:00ට ලැබුණු වාර්තාවේ සඳහන් බව ද එම පොලිසිය පවසයි.
