තරුණ මාධ්‍යවේදීයෙකු වන විමුක්ති දුෂාන්ත 2025–2026 වර්ෂය සඳහා ශ්‍රී ලංකා-ඉන්දියා මාධ්‍ය මිත්‍රත්ව සංගමයේ (SLIMFA) උප ලේකම් ලෙස පත් කර ඇතැයි වාර්තා වේ. ශ්‍රී ලංකාවේ මාධ්‍ය, මහජන සන්නිවේදනය සහ සංහිඳියාව හා ව්‍යවස්ථා ප්‍රතිසංස්කරණ ක්ෂේත්‍රයන්හි දැක්වූ වැදගත් දායකත්වය වෙනුවෙන් මෙම පත්කිරීම සිදු කර ඇති බවයි සදහන් වන්නේ.
Info Sri Lanka (www.infosrilanka.lk) වෙබ් මාධ්‍ය වේදිකාවේ නිර්මාතෘවරයා වන විමුක්ති දුෂාන්ත, මීට පෙර ජනාධිපති ලේකම් කාර්යාලය යටතේ ක්‍රියාත්මක වූ ජාතික ජනසභා ලේකම් කාර්යාලයේ සන්නිවේදන හා මහජන සබඳතා අධ්‍යක්ෂ ලෙස කටයුතු කර ඇත. ඔහුගේ දිගු කාලීන මාධ්‍ය පළපුරුද්ද තුළ සී/ස එක්සත් ප්‍රවෘත්ති පත්‍ර සමාගමේ (ලේක් හවුස්) ආයතනයේ ඩිජිටල් මාධ්‍ය සංස්කාරක තනතුර, එක්සත් ජාතීන්ගේ සහායකත්වයෙන් ක්‍රියාත්මක වූ ‘අහන්න’ සංහිඳියා ව්‍යාපෘතියේ මාධ්‍ය අංශය, සහ අගමැති කාර්යාලය යටතේ ක්‍රියාත්මක වූ සංහිඳියා යාන්ත්‍රණ පිළිබඳ සම්බන්ධීකරණ ලේකම් කාර්යාලයේ (SCRM) මාධ්‍ය සහ සන්නිවේදන කටයුතු සඳහා දායක වී තිබේ.
විමුක්ති දුෂාන්ත INSEL Holdings (Private) Ltd ආයතනයේ සභාපතිවරයා ලෙස ද මේ වනවිට කටයුතු කරමින් සිටින අතර, එමෙන්ම ඔහු විකල්ප මාධ්‍ය ජාලය, PMDR, සහ ACBPA වැනි සමාජ හා ප්‍රතිපත්ති ආයතන වලටද සම්බන්ධව කටයුතු කරයි. එසේම විදුලි බල අමාත්‍යාංශය යටතේ ක්‍රියාත්මක වූ දූෂණ මර්දන කමිටුව, අපේක්ෂා රෝහල් සංවර්ධන කමිටුව, සහ වෘත්තීය වෙබ් මාධ්‍යවේදීන්ගේ සංගමය (PWJA) ආදී ජාතික කමිටු කිහිපයකට ද ඔහු සම්බන්ධව සිටියි.
2024 වසරේදී ඉන්දිය මහ කොමසාරිස් කාර්‍යාලයගේ අනුග්‍රහයෙන් ආරම්භ කරන ලද ශ්‍රී ලංකා–ඉන්දියා මාධ්‍ය මිත්‍රත්ව සංගමය (SLIMFA) යනු දෙරට අතර මාධ්‍ය සහ සන්නිවේදන හරහා ජනතා මට්ටමින් පැවති පැරණි මිත්‍රත්වය තවදුරටත් ශක්තිමත් කිරීම උදෙසා ක්‍රියාත්මක වන නොලාභදායී සංවිධානයක් වේ.
SLIMFA සංවිධානය කළ ප්‍රධාන සිදුවීම වූ Media Fest 2025 මීට පෙර අප්‍රේල් මාසයේදී Taj Samudra Hotel, Colombo හිදී පැවැත්විණි. එම උළෙලේදී ඉන්දියාව සහ ශ්‍රී ලංකාව නියෝජනය කරන වාර්තාකරුවන්, මාධ්‍ය සිසුන්, නිර්මාණකරුවන් සහ ප්‍රවෘත්ති ප්‍රවීණයන් එක්විය.
එහි දී AI Journalism, Mobile Content Creation, Disinformation, Monetization, සහ Media Ethics වැනි තේමා විශේෂ මත සාකච්ඡා සිදු විය.
