ඊශ්‍රායලය ගාසා තීරයේ ස්ථාන කිහිපයක් වෙත එල්ල කළ ප්‍රහාරවලින් 90කට වැඩි පිරිසක් මියගොස් ඇති බව විදෙස් මාධ්‍ය වාර්තා කරයි.
ගාසාහි සටන්විරාමයක් ඇතිකර ගතයුතු බවට ඊශ්‍රායල අගමැති බෙන්ජමින් නෙතෙන්යාහු වෙත දැඩි පීඩනයක් එල්ල වෙමින් ඇති පසුබිමක, ඊශ්‍රායලය ගාසා වෙත එල්ල කරන ප්‍රහාර තීව්‍ර කිරීම විශේෂත්වයකි.
ඉරානය සමඟ පැවති දින 12ක යුද්ධය අවසන් වී ඇති පසුබිමක ඊශ්‍රායලයේ අවධානය නැවතත් ගාසා තීරය වෙත එල්ල වී ඇත.
ඒ අනුව ගාසා තීරයේ උතුරු කලාපය ඇතුළු ස්ථාන රැසක් ඉලක්ක කරගත් ප්‍රහාරවලින් ඊයේ පමණක් මෙලෙස පුද්ගලයින් 90කට වැඩි පිරිසක් මියගොස් ඇතැයි විදෙස් මාධ්‍ය වාර්තා කර ඇත.
ඊශ්‍රායල ප්‍රහාරවලින් බටහිර ගාසා හි පිහිටි වෙරළ අවන්හලක් ඉලක්ක වී ඇති අතර, එහිදී පුද්ගලයින් 20කට වැඩි පිරිසක් මියගොස් ඇති බව වාර්තා වේ.
මෙම අවන්හල ගාසා හි රැඳී සිටින මාධ්‍යවේදීන්, ක්‍රියාකාරීන් මෙන්ම සිවිල් වැසියන් ද නිතර රැඳී සිටින ස්ථානයක් ලෙස සැලකෙන අතර අල් බඛා අවන්හලට එල්ල වූ ප්‍රහාරයෙන් තවත් විශාල පිරිසක් තුවාල ලබා තිබුණි.
මේ අතර ගාසාහි පාසල්, මෙන්ම ආහාර බෙදාදීමේ ස්ථාන ඉලක්ක කරගෙන මෙලෙස ඊශ්‍රායල ප්‍රහාර එල්ල වී ඇතැයි වාර්තා වේ.
කෙසේ නමුත් සටන්විරාමයක් ඇතිකරගැනීමට නෙතෙන්යාහු සහ හමාස් සංවිධානය අතර මේ වනවිට සාකච්ඡා පවතින බවට ජනාධිපති ඩොනල්ඩ් ට්‍රම්ප් ද සිය සමාජ මාධ්‍යයක සටහනක් පළකර තිබුණි.
