මේ වන විට ආරම්භ වී ඇති ජාතික මදුරු මර්දන සතිය නිමිත්තෙන් සිදුකළ විශේෂ පරීක්ෂාව අනුව අද (01) දිනයේදී පරිශ්‍ර 22,294ක් පරීක්ෂාවට ලක් කළ බව සෞඛ්‍ය අමාත්‍යාංශය පවසයි.
එහිදී මදුරුවන් බෝ විය හැකි පරිශ්‍ර 4,965ක් හඳුනා ගනු ලැබූ බවත් මදුරු කීටයන් සහිත පරිශ්‍ර 657ක් හඳුනා ගත් ඉන් 553 දෙනෙකුට රතු නිවේදන නිකුත් කළ බවත් ජාතික ඩෙංගු මර්දන ඒකකයේ ප්‍රජා වෛද්‍ය විශේෂඥ ප්‍රසිලා සමරවීර පවසයි.
එමෙන්ම 153 දෙනෙකුට නඩු පැවරීමට පියවර ගත් බවද විශේෂඥ වෛද්‍යවරිය මෙහිදී පැවසුවාය.
එමෙන්ම ඊයේ සහ අද දිනයේදී පරිශ්‍ර 48,354ක් පරීක්ෂාවට ලක් කළ බවත් එයින් මදුරු කීටයින් බෝ විය හැකි ස්ථාන 10,591ක් හඳුනාගත් බවත් පෙන්වා දෙන විශේෂඥ වෛද්‍යවරිය පැවසුවේ එය සෑම ස්ථාන 10කින් 1ක් වන බවයි.
මීට අමතරව 1,611ක මදුරු කීටයින් හඳුනාගත් බවත් ඉන් රතු නිවේදන 1,193ක් ද නඩු පැවරුම් 256ක්ද සිදුකළ බවත් විශේෂඥ වෛද්‍යවරිය මෙහිදී පෙන්වා දුන්නාය.
ජාතික මදුරු මර්දන සතිය ඊයේ (30) වැනි දිනෙන් ආරම්භ වූ අතර එය එළැඹෙන 05 වැනි දින දක්වා ක්‍රියාත්මක වීමට නියමිතයි.
