කපුවකු ලෙසින් නිවසට පැමිණ 14 හැවිරිදි දැරියක ගැබිණියක කිරීම හේතුවෙන් වරදකරු වූ පුද්ගලයකුට පානදුර මහාධිකරණ විනිසුරු සමන් කුමාර ඊයේ (07) වසර 15ක බරපතල වැඩ සහිත සිරදඩුවම් නියම කළේය.
හොරණ, හිඹුටුහේන ප්‍රදේශයේ පදිංචි ගාලුගේ සුරංග පුෂ්පකුමාර නමැති 44 හැවිරිදි පුද්ගලයකුට මෙලෙස සිරදඩුවම් නියම වී ඇත.
එකී සිරදඩුවමට අමතරව වින්දිත දැරිය වෙනුවෙන් රුපියල් ලක්ෂ 5ක වන්දි මුදලක් ගෙවන ලෙසත්, එම මුදල් නොගෙවන්නේ නම් මාස 24 ක ලිහිල් වැඩ සහිත සිරදඩුවමක්ද නියම කර ඇත.
චූදිතයා 2021 වර්ෂයේදී කපුවකු වෙසින් හොරණ, හිඹුටුහේන ප්‍රදේශයට පැමිණ එවකට වින්දිත දැරියගේ මව සමඟ අනියම් සම්බන්ධතාවයක් ගොඩනඟාගෙන එම නිවසේ පදිංචිව සිට ඇත.
එම කාලසීමාව තුළදී එකී දැරිය අපහරණය කිරීමෙන් පසු ගැබිණියක බවට පත්කිරීම හේතුවෙන් අත්අඩංගුවට ගෙන හොරණ මහේස්ත්‍රාත් අධිකරණයේ මූලික සාක්ෂි විභාග කිරීමෙන් අනතුරුව නීතිපතිවරයා විසින් මහාධිකරණය හමුවේ නඩු පවරා තිබිණි.
