මහනුවර දිස්ත්‍රික්කයේ ප්‍රාදේශීය රෝහලක ගිලන් රථ රියැදුරකු සෞඛ්‍ය කාර්ය සහයිකාවකට ගිලන් රථයක් තුළ දී අතවර කළ බව කියන සිද්ධියක් සම්බන්ධයෙන් මහනුවර දිස්ත්‍රික් සෞඛ්‍ය සේවා අධ්‍යක්ෂ කාර්යාලය මගින් පරීක්ෂණයක් ආරම්භ කර ඇති බව වාර්තා වේ.
ප්‍රාදේශීය රෝහලේ සිට ගම්පොළ රෝහලට මාරු කරන ලද තරුණියක් රැගෙන අදාළ සෞඛ්‍ය කාර්ය සහායිකාව ගිලන් රථයේ පැමිණ තිබෙන බවත් තරුණිය රෝහලට ඇතුළත් කර ආපසු යන අවස්ථාවේ පාළු ස්ථානයක දී රියැදුරු ඇයට අතවර කර තිබෙන බවත් පරීක්ෂණ මගින් අනාවරණය වී ඇති බවයි සදහන් වන්නේ.
සිද්ධිය සම්බන්ධයෙන් සෞඛ්‍ය කාර්ය සහායිකාව පොලිසියට පැමිණිල්ලක් කර නොමැති අතර එයට හේතු වී ඇත්තේ ගිලන් රථ රියැදුරාගේ තර්ජනය කිරීමක් බව දැනගන්නට ඇත.
සිද්ධිය සම්බන්ධයෙන් මේ වනවිට පරීක්ෂණයක් ආරම්භ කර තිබෙන බව මේ සම්බන්ධයෙන් කළ විමසීමක දී මහනුවර දිස්ත්‍රික් සෞඛ්‍ය සේවා අධ්‍යක්ෂ වෛද්‍ය සේනක තලගල පවසයි.
සිද්ධිය සම්බන්ධයෙන් සෞඛ්‍ය කාර්ය සහායිකාව පුපුරැස්ස පොලිසියට ඊයේ (14 වැනිදා ) පැමිණිල්ලක් ඉදිරිපත් කර ඇති අතර පැමිණිල්ල සම්බන්ධයෙන් විමර්ශනයක් ආරම්භ කරමින් අදාළ කාන්තාව වෛද්‍ය පරීක්ෂණයක් සඳහා ගම්පොළ රෝහලට යොමුකළ බව පොලිසිය පවසයි.
