කොළඹ වරාය පරිශ්‍රය තුළ තිබී සොයාගත් සමූහ මිනීවළක කැණීම්වලින් අවම වශයෙන් පුද්ගලයින් 88 දෙනෙකුට අයත් අස්ථි කොටස් හමුවී ඇති බව කැණීම් නිලධාරීන් තහවුරු කරයි.
තාවකාලිකව නවතා දමා තිබූ මිනීවළේ තුන් වන අදියරේ කැණීම් කටයුතු මේවන විට යළි ආරම්භ කර ඇත.
කොළඹ අතිරේක මහේස්ත්‍රාත් කසුන් කාංචන දිසානායකගේ අධීක්ෂණය යටතේ සමූහ මිනීවළේ කැණීම් කටයුතු සිදුවන අතර සමූහ සුසාන කැණීමෙහි ලා මෙරට ප්‍රවීණයෙකු වන පුරාවිද්‍යාව පිළිබඳ ජ්‍යෙෂ්ඨ මහාචාර්ය රාජ් සෝමදේවගේ මෙහෙයවීම මත කැණීම් කටයුතු සිදුකරයි.
එහි වෛද්‍ය විද්‍යාත්මක කටයුතු භාර වී ඇත්තේ විශේෂඥ අධිකරණ වෛද්‍ය සුනිල් හේවගේ වෙතය.
ඉඟුරුකඩේ මංසන්ධියේ සිට කොළඹ වරාය දක්වා දිවෙන කුලුනු මතින් ඉදිවෙන අධිවේගී මාර්ගයේ ඉදිකිරීම් කටයුතු සඳහා පොළොව හාරමින් සිටින අතරතුර 2024 ජූලි මස 13 වන දා මිනිස් අස්ථි කොටස් හමු වී තිබුණේ කොළඹ වරායේ පැරණි ලේකම් කාර්යාලය පරිශ්‍රයෙනි.
අධිකරණ අමාත්‍ය හර්ෂණ නානායක්කාර මෑතකදී පැවසුවේ ශ්‍රී ලංකාව මේ වන විට රට පුරා සමූහ මිනීවළවල් 17 ක් වාර්තාවී ඇති බවයි.
